想感受北歐聖誕氣息?嚟緊週末快啲去赤柱廣場啦!每年赤柱廣場都會舉行聖誕市集,邀請嚟一大班本地及外地參展商參與,仲有好多表演同影相位添!
今年聖誕市集以芬蘭為主題,喺12月9至10日同16至17日,一連兩個星期六日,喺赤柱廣場天幕廣場舉行!小編尋日就去咗啦,一齊睇吓有乜好推介啊!
脆皮豬肘配酸椰菜 $60
年年聖誕市集呢個攤位都排曬長龍,就咁睇條龍都知好味啦!豬肘真係好爽脆,咸豬手肉配上脆卜卜嘅皮再加上軟綿綿嘅酸椰菜同芥茉真係好夾啊!
三色鹿肉香腸 $60
鹿肉香腸你試過未?小編自己就鐘意食紅色同白色嘅脆皮腸,而同行朋友就話黑色嘅血腸好好味!大家不妨黎試吓啦!
芬蘭聖誕撻 $30
呢個芬蘭聖誕撻好好味啊!佢嘅撻皮就算凍咗都好香甜,配上香軟嘅水果餡,正!
芬蘭肉丸 $40
呢個肉丸唔會好油,好重香草味,加埋熱辣辣嘅醬汁,好有北歐風味!
除咗食嘢,仲有好多攤檔賣各式手工製品同聖誕禮物添!係場內消費滿600蚊,可以換隻Kuksa手工杯返屋企!
今次市集都有幾個特色影相位,俾大家體驗吓芬蘭冬日嘅美。
「芬蘭Jacuzzi拍照區」最有特色,大會有提供厚身外套,仲不時噴出蒸氣俾大家體驗一吓芬蘭浴。
「雪地奇緣音樂舞台」嘅造型好似一個巨型音樂盒,周圍都係閃令令嘅冬日裝飾,記得影多啲相啊!
「異國極光玻璃屋」,除咗影相仲可以戴上VR眼鏡睇北極光!仲有鹿車俾你座上去影相添!
另外,如果你下載咗領展App「泊食易」,仲有閃燈汽球送添!入夜之後影相好靚架!
有興趣嘅朋友可以搭大會安排免費接駁巴士入赤柱,由海洋公園或筲箕灣出發,又或者可以搭香港仔開出嘅免費穿梭船去赤柱碼頭。
日期:12月9日、10日、16日及17日
地點:赤柱廣場天幕廣場
