小編成日飛日本，有人問過小編：「成日去日本唔悶㗎咩？」當然唔悶啦！日本多野玩之餘，仲有幾樣係香港好難遇到嘅事。今次，就等我同大家講下日本有咩事咁吸引我啦！

#    食煙文化

（google圖片）

    「食煙文化」講緊嘅係煙民嘅自律，點樣係唔影響到其他人嘅情況下食煙。小編對煙味特別敏感，亦同好多非煙民一樣好憎人食煙。係香港，煙民永遠「自由」行先，妄顧其他人嘅健康，係車站附近，又或者係交通燈附近食煙。甚至會有俗稱「火車頭」嘅煙民邊行邊食，香港人多路窄，一唔好彩行係個「火車頭」後面，真係神仙都難救。係日本，煙民係會為非煙民著想，企埋一邊食，甚至會用煙味無咁濃烈嘅電子煙，以減低對其他人造成嘅影響。奈良縣仲立法禁止食完煙後45分鐘內搭????，以免大家食三手煙。「食煙文化」係要靠煙民自律，每次去日本，小編都會講句：「如果香港啲煙民學到日本嘅一半就好啦！」

#    寧靜嘅車箱

（google圖片）

小編最鍾意搭車嗰陣聽歌訓教。係香港，想係車入面靜靜地聽歌訓教，係一件非常非常之難嘅事嚟，啲人唔係大聲講野就係大聲傾電話，仲有啲人開住大聲公播歌播片同打機。每次係香港搭車，小編都會比啲噪音嘈醒。係日本，雖然大家都會傾計同講電話，但就會細細聲講，盡量唔好嘈到人。小編我作為一個鍾意「靜」嘅人，日本嘅車箱自然係小編鍾意去日本嘅一個主因。

#    準時嘅班次

（google圖片）

眾所周知，日本嘅班次係非常準時，話30分開就真係30分開，唔會遲亦都唔會早。想知班車幾時到，只要上網搵「時刻表」就可以。對比香港，你永遠唔知㗎車真正到嘅時間。每次等巴士，明明寫住15至20分鐘一班，都可以等成30分鐘都未有車到。地鐵班次密都還好，但搭巴士、小巴，要預啱時間真係好難。係日本，無論鐵路定巴士都非常準時，要預時間都特別輕鬆簡單。

#    耐性

（google圖片）

    香港精神就係「快」！香港人做乜都好心急，就連買野、用ATM等等，都要9秒9完成。係香港，買完野之後想擺返好啲戰利品都會招人現眼，小編每次都覺得咁做有一股莫名嘅罪惡感。日本人就相對有耐性，會等你擺返好啲錢，再將包好嘅貨品交到你嘅手中，而且後面嘅客人係唔會有半句怨言，耐心咁等候。小編都知香港嘅生活節奏緊迫，但買野都咁大壓力嘅時候，日本人嘅耐性自然非常加分。

#    煙灰缸同垃圾桶分開

（google圖片）

    雖然日本嘅街上面無乜垃圾桶，但街上遠比行兩步都係垃圾桶嘅香港乾淨。點解？除咗當地人嘅公德心之外，煙灰缸同垃圾桶分開都係一個重要元素。香港嘅垃圾桶對上就係煙灰缸，一大陣煙味令人唔敢行埋去揼垃圾，只會離遠咁揼。「劉江華」（垃圾桶）個口仲越嚟越細，要揼中就更加難上加難。係日本，佢哋嘅垃圾桶同煙灰缸分開，再加埋日本人嘅公德心，令成個日本都特別乾淨。

#    包裝

（google圖片）

    雖然日本人好講究環保，但買野都會主動比膠袋。成日都話日本人好細心，係「包裝」方面就可以睇到。熱食、凍食同粉狀、液體嘅非食品（例如：洗頭水、洗衣粉等）會分開唔同嘅膠袋。有次係福岡嘅7仔買M巾，店員幫我用紙袋包好，等我無咁尷尬。對比香港，就算未有膠袋徵費都好，店員都會將所有野盡量塞哂係同一個袋到。可能你會覺得日本人咁做好浪費，但總比食物被化合物污染好。再且，啲膠袋可以用嚟裝垃圾。諗深一層，細心得嚟又唔浪費。

    當然，日本仲有好多地方吸引我，好似啲食物特別好食、啲人又有禮貌等等。但以上所講嘅事，問心要係香港依個彈丸之地發生真係難上加難，特別係一啲講求人為道德嘅事，就更加難係香港發生。如果每個人都可以好似日本人咁，凡事多為人著想，你話依個世界會變得幾美好呢？