係香港，即使係冬天，日日洗頭都在所難免。但你知唔知洗頭原來都有好多禁忌，只有正確洗頭先唔會傷害頭髮。下面小編為你總結幾個我哋平時洗頭常見嘅錯誤。

錯誤一：簡單沾濕頭髮就到洗髮水

包括小編自己之前都好鍾意咁做，簡單淋一淋頭，好似濕左就倒洗髮水，但其實咁樣，係洗唔乾淨頭髮嘅。正確嘅方法係，倒洗髮水之前先用溫水冲洗頭皮同頭髮1分鐘以上，令頭髮嘅毛鱗片打開，同時溶解油污。之後再將洗髮水倒係手心，搓出泡沫之後再搽係頭髮上揉搓。

錯誤二： 大力用指甲抓洗頭皮

我哋經常會覺得大力啲洗就會乾淨啲，其實唔係嘅。首先用指甲抓可能容易抓破頭皮；其次指甲中會藏匿好多細菌，容易引發感染。所以，正確嘅方法就係用指腹輕輕按摩頭皮，摩擦頭皮即可。

錯誤三：護髮素塗抹係髮根

護髮素嘅作用令頭髮上嘅毛鱗片順滑，塗抹係髮根就會好容易阻塞頭皮毛孔。正確方法係理順頭髮之後，沿耳仔位塗向髮尾，唔好比護髮素掂到頭皮。

錯誤四：護髮素未冲乾淨

有人會覺得，殘留護髮素係頭髮上會令到頭髮更加順滑，但其實會殘留嘅護髮素會黐住啲空氣中嘅灰塵，甚至會堵塞毛孔。所以，護髮素或者髮膜一定要沖洗乾淨。

錯誤五：濕頭發訓覺

有時我哋沖完涼，洗完頭之後已經比較夜，又眼訓，好想直接訓覺。但其實咁樣好傷頭髮。啱啱洗完頭，頭髮嘅毛鱗片係張開狀態，頭髮比較嬌弱，訓覺時會不停摩擦頭髮，容易損傷毛鱗片，令頭髮容易斷。一定要吹乾先好訓覺。

錯誤六：濕頭髮外出

我哋有時出門之前洗頭，趕唔切吹頭就出門，其實咁樣會令到出面強烈嘅紫外線傷害未閉合嘅毛鱗片，就會好容易出現分叉、乾枯、頭髮易斷等問題。一定要吹乾頭先出門口。