小編有個壞消息同大家講，主打夢幻華麗風嘅彩妝品牌Jill Stuart已經全線撤出香港，聽到呢個消息少女心真係碎到一地都係！早前官方確認，將會全面撤出中國市場，香港、上海分店已全面結業，就連台灣同泰國等亞洲地區都將會陸續撤離。

即使未用過Jill Stuart Beauty化妝品，大概亦會被佢公主風嘅精緻包裝所吸引。品牌產品主打甜美少女風，粉嫩色調同漂亮包裝都係令人想收藏嘅原因之一。日本Jill Stuart Beauty於2008年來到香港，當時已成功引起一班女生嘅注意同支持，高峰時期多間大型百貨公司，如Sogo、Beauty Avenue都有佢嘅專櫃。但原來品牌已於6月尾全線撤出香港。

品牌於官方微博承認將撤離中國銷售市場，暫時將專心發展天貓旗艦店與日本市場，同時宣佈天貓旗艦店嘅產品將會與日本同步推出。雖然無實體店，未能親身將化妝品先試色同感覺妝效先買，的確係有啲不便同感到可惜，但仍然可透過網購方式買得到品牌嘅產品，鍾意Jill Stuart Beauty嘅女生唔需要過份擔心。

品牌有林林總總嘅化妝品，但要講到代表作嘅話，一定係四色胭脂。雖然類似嘅產品於市面上已有眾多，但不得不讚Jill Stuart嘅四色胭脂喺色彩配搭上比較多選擇，共有7款嘅組合選擇，可接照個人喜好個別使用其中一個色調或混合使用打造不同妝容效果，甚或當成Highlight使用。隨胭脂附送嘅伸縮化妝掃亦係另一吸引之處，純白掃加上銀色掃柄，拎出嚟補妝真係會吸引唔少目光！

而眼影都係好受大家歡迎嘅產品！一盒深淺顏色配搭好晒，而且每次嘅組合都非常易襯～ 幼細嘅粉質加埋微微嘅珠光，令妝容添上一陣氣質女生嘅感覺。而Jill Stuart嘅眼影唔係得個包裝靚，顯色度同貼服度都好高架。加埋每次有唔同主題嘅限定包裝，就算明知用唔晒都會忍唔住買完一盒又一盒～

行夢幻路線嘅Jill Stuart，推出嘅香水更係大家嘅收藏之選！香水蓋上晶瑩剔透嘅水晶花設計真係令人好心動，甜美芬芳嘅香氣更令人心情開朗～

部分產品仍於香港Sephora網店有售，有興趣可點撃連結瀏覽網店。