小編早前就介紹咗幾間Workshop俾大家，不過好似太girly，今日一於同大家向高難度挑戰，試下金工銀飾嘅手作班喇！其實「金工」係台灣都流行咗一段時間，但似乎香港就比較少呢類型嘅Workshop，今次小編帶大家走入觀塘，尋訪一間充滿人情味嘅工作坊喇！
唔好睇呢到地方細細，麻雀雖少，但五臟俱全架。一入去已經見到整齊有致嘅工具列，成個格局都好舒服，完全無壓迫感。可能你會問，我想要戒指／手鐲，點解我唔去Pandora或者Tiffany & Co.去買（叫男朋友送）？因為咁樣就唔夠獨一無二，戒指、手鐲呢種咁貼身嘅物品，如果由自己親手打造，份心意同誠意絕對貴重過其他名牌！
金工絕對係一個唔可以馬虎嘅工作，每個細節都要一步一步嚟，其實都要花好多心機同精神，先可以造出靚嘅成品！係呢個Workshop入面，Kelvin會逐步逐步教導你去完成，絕對唔洗擔心自己整得唔好睇。
造戒指首先就係卓弓開料同退火，簡單啲嚟講就係將銀條屈成想要嘅尺寸先，先做咗雛形，然後用火槍加熱銀線，等佢軟化先可以塑形、捍接同刻字，不過要小心唔好燒過龍，如果唔係銀線就會融架喇。
完成左以上幾個步驟嘅時候，就離成功不遠了。不過接下來嘅步驟都要好小心，因為要將戒指打磨拋光，等表面變得光滑。問起Kelvin點解會創辦自己嘅Studio，因為都係想有一個屬於自己嘅地方，係呢到可以盡情咁創作自己嘅藝術品。Kelvin試過由朝到晚都係studio到造金工，原來對住自己鐘意嘅野，真係可以去到好盡！
當你見到自己親手造作嘅銀飾，真係好有滿足感！如果你都想製作一隻獨一無二嘅戒指、手鐲，真係可以考慮嚟呢個工作坊，唔止係擁有一枚戒指、一隻手鐲，仲係有專屬自己嘅打造時光同回憶，留下一段美好嘅回憶。如果你偷偷地幫另一半整一隻屬於佢嘅戒指，我諗對方一定會好感動！
詳情：
Spark Metal
Facebook: @sparkmetal.hk
Instagram: Spark_Metal
地址: 觀塘敬業街59號 敬業工廠大廈
#自己的首飾自己做 留住金工手作的溫度
