荃灣一帶嘅美食非常多，今次我地就嚟到當區相當出名嘅正宗山西刀削麵皇食野啦。呢間係家庭式經營嘅店鋪，由二十年前開業，並係數年後開設分店，到而家已經成為老字號。店鋪本身以人手拉麵作為主打，慢慢地改為賣人手製刀削麵，而拉麵就改為機拉。

夏天咁熱，想消暑就當然係要食返啲冰凍嘅野啦！正宗山西刀削麵皇除咗提供各色各樣嘅冷盤小食，仲有多款唔同嘅冷刀削麵任君選擇，大熱天時食就啱哂啦。

涼拌青瓜 $32
呢款冷盤大家都應該好熟悉啦！切成塊狀嘅青瓜清脆爽口，非常香甜。醬汁食起嚟酸酸甜甜，夏天食就好開胃啦。因為入面加咗蒜粒同麻油，令青瓜食起嚟更加香。

口水雞 $50
小食嘅表面灑上花生，雞肉份量十足，而且肉質嫩滑。醬汁係店鋪以紅油同埋自己調嘅辣椒醬製成，為雞肉加添絲絲辣味。

蒜泥燻蹄 $50
燻蹄上面放滿咗大量嘅蒜泥，放上枱就可以聞到好濃烈嘅蒜香。蒜泥係以生蒜加埋醋製成嘅，食嘅時候會好似芥末咁樣帶嚟一陣嗆人鼻腔嘅辣味。蒜泥同燻蹄嘅味道好夾，鐘意食蒜嘅話就一定會食到停唔到口。

消暑冰拉麵 $58
呢款本身係刀削麵嚟，但就可以揀轉做拉麵或者係米線，今次我地就試咗拉麵。麵上嘅冰粒令成個麵食散發住冰涼嘅氣息，喺熱天食就啱哂啦。當中加入青瓜絲，燻蹄絲，泰式雞醬同埋麻辣醬，食之前撈一撈就可以令麵條沾上醬汁。酸甜嘅味道令你喺悶熱嘅天氣下都可以胃口大開！

刀削麵套餐 配豆漿或熱飲 單拼$47 雙拼$50
呢度嘅刀削麵係人手做咖，坐啱位仲可以見到師傳即場削麵添！呢次我地揀咗牛肚同紅燒豬手做雙拼套餐，刀削麵做得好煙韌，牛肚彈牙之餘仲好入味，而豬手就燜到好淋。最正嘅就係個湯底啦，餐廳用咗豬骨，燒骨同埋雞殼去煲，出咗嘅湯清澈鮮甜，夾埋刀削麵真係無得彈呀！

正宗山西刀削麵皇
地址: 荃灣沙咀道245號坤德樓地下 (24091209)