女士們最愛做嘅事就當然唔少得約埋閨蜜周圍去啦，今次帶大家嚟到位於九龍灣展貿中心嘅Casa Luca食好野。呢間餐廳採用開放式嘅設計，而且裝潢優雅。店內設有多款座位，包括沙發卡座，酒吧式高枱，矮茶桌等等，各有特色嘅座位打造出一個個打卡位，保證你可以影到滿載而歸。

今個夏天，Casa Luca特別推出咗一款夏日下午茶。呢款下午茶採用英式風格，精緻嘅造型令佢登場嘅時候驚豔眾人。入面包含嘅小食唔單只有甜食，仲有咸食咖。

夏日下午茶 $99* (原價 $110)

底層有法式焦糖布丁，雜菌酥盒，提子乾鬆卷，墨汁包吞拿魚三明治。

法式焦糖布丁嘅表面有一層脆焦糖，為整道甜品帶嚟陣陣香氣。下面嘅布丁就非常軟滑可口。

雜菌酥盒係一款咸食。菇菌喺炒香之後放入鬆軟嘅酥盒中呈上。菇類嘅香氣四溢，食落非常爽口。

墨汁包吞拿魚三明治同樣係一款咸食，加入墨汁嘅包身呈現黑色，中間就夾住吞拿魚碎。

提子乾鬆卷嘅香脆表面上灑有糖霜，卷入面除咗放有提子乾，仲加入咗朱古力。所以成個鬆卷都會充滿朱古力嘅香氣 ，令人為之迷醉。

中層就有迷你牛角酥，同埋自家製雪糕。

擁有香脆表皮嘅牛角酥上放咗濃滑嘅吉士醬，為成件小食帶嚟微甜嘅味道，加埋上面酸酸甜甜嘅士多啤梨一齊食用就更係令人食指大動。

呢款自家製雪糕口感軟滑，食落唔會帶有好重嘅奶味，俾人一種食緊雪葩嘅感覺。

而最上層就有小鳥依人同埋吉士酥盒。

小鳥依人呢款小食以桃同鴨胸作配搭，相當新奇。鴨胸香氣十足，而清甜嘅桃肉不但吸收咗鴨胸嘅味道，亦中和咗肉類帶嚟嘅油膩感覺。享用嘅時候會品嚐到甜味與咸味交錯，令呢道小食充滿驚喜感。

吉士酥盒中當然就有滿滿嘅吉士醬啦，上面就配搭咗士多啤梨。整個酥盒充滿咗果香，喜愛水果酥嘅你絕對唔可以錯過呢款小食呀！

*只要持有E-max Fun卡或於E-max內消費，於九龍灣國際展貿中心工作，或者係Casa Luca嘅會員，就可以優惠價格($99)購買夏日下午茶。

夏天嘅餐桌就當然唔少得沙冰啦！各款水果沙冰嘅顏色明亮鮮豔，為人帶嚟好心情。因為啲沙冰雪得夠凍，飲一啖都已經將暑熱驅走大半。

青蘋果沙冰 $43

夏日桃沙冰 $42

夏日芒果沙冰 $42

Casa Luca
地址:九龍灣國際展貿中心2/F 34及34A號鋪(2778 7782)