今次窮人食家去到長沙灣搵食，一出元洲邨過馬路就見到一間好多人嘅小食店，叫小食堡，小編梗係過去湊下熱鬧，睇下有咩好食啦！今次一樣都係係度買咗50蚊野食，但就史無前例咁飽啊！真心街坊人情價，仲好好食添！

炸魚蛋 $14、炸雲吞 $14

炸物係即叫即炸嘅，魚蛋係手打魚蛋，好大粒，不過對小編呢D唔食魚嘅人黎講魚味好重，但如果鐘意食魚嘅朋友就啱晒啦！炸雲吞都係魚肉餡，不過相對魚味無咁重，個皮炸得好香脆，夾埋入面嘅魚蛋餡口感好豐富，小編見佢當日都包緊雲吞，真係粒粒足料架！

大碗仔翅 $15

碗仔翅比較厚身，同埋入面有蟹柳，唔算好出色，但15蚊咁大碗真係好抵食，一碗抵一餐啦可以！

大菜糕 $7

好少可見賣炸物嘅鋪頭有賣大菜糕，叔叔加咗好多花奶比我，食完炸物之後食冰冰涼涼嘅大菜糕真係好正，大菜糕唔會好甜，加埋啲花奶一齊食啱啱好！小編強烈建議大家炸雲吞配大菜糕，勁掂啊！

當日見到小鋪由一男一女經營，應該係小本生意，落手落腳親力親為，可能因為咁先可以提供大件夾抵食嘅食物比大家，2個人做到踢晒腳真係唔簡單啊！下次再去開長沙灣一定會再支持吓！今次我地2個就食飽飽啦，你地又有咩小食推薦呢？話比小編知，等我又去試吓！