今次郊遊習作想同大家去行髻山，呢條都係一個非常短又易行嘅路線，一個鐘內就可以行完。髻山，又名丫髻山，座落於香港元朗區橫洲北面，高度海拔121米，分隔咗元朗工業園及天水圍新市鎮。今次我地由天水圍天慈路出發登上髻山，山勢雖然唔高，但視野非常良好，可以遠眺尖鼻咀名南生圍一帶魚塘。

首先係西鐵天水圍站E1出口出發，沿天福路一直行，對面見到天慈花園再平行過馬路就到達今次嘅起點。由天慈路轉入蝦尾新村路，經過朗天停車場繼續向前行，再行會見到2條分岔路，2次都轉左就岩啦！

係度會見到個鐵絲網圍住嘅路，直入行過對面就得啦。之後正式進入山路，呢度超多芒草同其他植物，仲見到唔少野花，大家最好著長褲以免刮花隻腳啦！

話甘快就上到頂啦，呢度風景一望無際，山仔細細，但360度風景一覽無遺，唔怪之得成為晨運熱門地，東面睇到工業村好似積木咁，南面就見到元朗西鐵架空路，西面就睇到天水圍新市鎮景色，北面睇到魚塘及對岸風景，行少少路就睇到咁多風景，真係好抵啊！

係山頂附近，有唔少人為設施比大家休息，睇得出呢度好受鄉里愛戴，仲有人係度種花、作畫，令短短嘅路線更多看點。不過提提大家，呢度唔少風水地，介意嘅朋友就唔建議上去啦，都請上山嘅朋友多加尊重。

沿路落山，注意一開始落山嘅路都幾多砂石，同有一定斜度，最好著啲有抓地力嘅鞋或者拎支行山竹輔助下，注意安全，慢慢條路會越黎越好行，好快就出返元朗盛屋村，大家可以搭74號小巴或者K68巴士離開。

難易度：⭐⭐✨

只有落山嘅時候要注意一下，路線大多平緩好行，不過最好著長褲行山鞋，拎返行山竹就最安全！

打卡度：⭐⭐⭐⭐⭐

360度風景一覽無遺，東南西北各有特色。

設施完善度：⭐⭐

超多休息位，都係行山人士自己放係度。不過廁所、指示欠俸，上山前好去定洗手間啦。

最後提提大家行山要準備充足，量力而行；最緊要係愛惜香港大自然，自己嘅垃圾自己帶走啊！今次嘅郊遊習作係咁多，想睇片就記住幫訂閱我地YouTube Channel啦！我地下次見啦！拜拜！