依家無論係咩年紀嘅人，對住電子設備嘅時間都多咗，尤其係呢排出少咗街，用多咗電話電腦打發時間，對眼都咪話唔攰。大家適時都應該幫雙眼舒緩疲勞，除咗可以改善工作效率外，都會令睡眠質素變好㗎。以下嘅方法都好簡單，大家得閒都可以試下做啊～
1. 利用眨眼運動眼部
首先用力合埋眼，再慢慢打開，咁樣可以避免眼睛過度乾澀、疲勞同埋充血。
2. 轉動眼球
首先合埋眼，眼睛向上下左右四個方向分別望30秒左右。然後保持合眼，眼球上下來回移動五次，左右方向同樣來回五次。依家可以打開眼睛，眼球順時針轉五圈，反方向同樣轉五圈。如果眼睛依然覺得疲勞，可以重覆以上嘅動作。
3. 交替望遠近物件
當你覺得眼睛疲勞嘅時候，可以將視線移去較遠嘅景物五秒，再轉移返到近嘅景物，如是者來回幾次能夠有效放鬆眼球。
4. 按壓眼球
合埋眼用食指、中指，無名指輕輕按壓眼球，亦可以旋轉輕揉，但唔可以持續太耐或者用力揉壓，大概20秒就要停喇。
5. 補充維他命
建議多啲攝取維他命A、C、D，例如紅蘿蔔、生果同海產。乳酪都係改善眼睛充血嘅好幫手，因為當中嘅維他命B2有效去眼部充血同混濁嘅現象。
Tags: Homita愛健康
如果你都想分享你嘅美容、時尚、旅行、運動心得，請將投稿文章連同不多於100字個人簡介同埋近照一張，電郵到： editor@homita.com.hk，文章經小編篩選後更有機會刊登喺我哋FB專頁，一經入選我哋會支付相應稿酬，仲唔快啲來投稿？
Author Information
You May Also Like
