日常生活、工作外出,我哋每日接觸到嘅嘢數之不盡,極容易會沾染到肉眼無法察覺嘅細菌同病毒,稍一不慎,隨時感染病倒。非常時期,固然要時時刻刻做好清潔消毒!但武漢肺炎疫情令全城惶恐,超市出現搶購潮,酒精搓手液、漂白水等喺市面都難以買到。但原來平日用嚟抗痘嘅茶樹精油,其實係殺菌消毒嘅好幫手!到底精油係咪真係可以殺菌?又要點樣用先有效?
1983年,澳洲聯合食品實驗室利用茶樹精油進行皮膚消毒實驗,未清洗前嘅手上平均50cm有3000個以上嘅細菌,用蒸餾水清洗過之後細菌數目係2000個左右,而用茶樹精油清洗後,竟然剩低唔夠3個細菌!
德國萊比錫大學實驗發現,茶樹能有效對抗26種皮癬菌、32種白色念珠菌、同22種小芽孢菌。研究顯示,只需0.25%濃度嘅茶樹精油就能抑制90%嘅大腸桿菌, 金黃色葡萄球菌亦只需要0.5%茶樹精油就能被抑制。最出乎意料嘅係,連對各種抗生素都已經產生抗藥性嘅超級細菌:抗甲氧苯青黴素性金黃色葡萄球菌,都能被茶樹精油消滅!
研究亦發現,茶樹油中含有Terpinen-4-ol,係有效對抗病毒細菌嘅成分之一,能殺死99.9%嘅家用細菌,喺澳洲更係唔少家庭嘅居家旁身用品,所以茶樹被稱為「用途最多,最有用嘅精油」係絕對實至名歸!但要留意嘅係要用100%純正茶樹油先有效。
通常1ml嘅精油,大約可滴出20滴。市面上一瓶10ml(約200滴)嘅茶樹精油嚟講,用百幾蚊就能買得到,依照下列方式製造一般家用清潔劑,非常經濟划算。事不宜遲,即刻睇下6大茶樹清潔消毒大法啦!
- 空氣清淨
滴幾滴茶樹精油於薰香器,放在想要加強清潔嘅地方(如廁所、臥室),令茶樹精油嘅香味瀰漫至少10分鐘,降低空氣中飛沫裡嘅病毒、細菌存活機率,亦可驅走中蚊蟲。若無薰香器,亦可滴於化妝棉上替代,但作用嘅範圍就會相對縮小。 - 消毒噴霧
將2滴茶樹精油加入100毫升嘅水,充分搖晃混合後,再噴灑於有異味嘅地方,用嚟消除異味,同時殺菌。
廁所馬桶最容易隱藏細菌,尤其係公共廁所,好難令人安心使用。不妨喺包內放一小瓶DIY茶樹清潔液,噴一噴先用,消毒殺菌外,順便消除公廁中難忍嘅異味。 - 家用清潔劑
喺一桶5公升嘅清水入面加入6滴茶樹精油,就可以用嚟洗抹布、碗碟、拖地、抹枱等,有助於殺菌,並消除污垢。 - 洗滌衣物
每次衫或者床單嗰陣,於洗衣槽內加入4滴茶樹精油,就能消毒殺菌、去除霉味,留下淡淡清香。 - 沐浴
將5-8滴茶樹精油滴於浴缸中,泡浴至少五分鍾,爲身體進行一般殺菌。 - 治療咳嗽和呼吸系統疾病
將茶樹精油2滴+桉樹精油3滴+天竺葵精油1滴,滴於香薰壚作蒸薰,可改善咳嗽和呼吸系統疾病。
*記得要將DIY茶樹清潔劑充分混合搖晃均勻先用,而且要室溫保存,避免陽光直射!
精油確實具有抗菌功效,至於能否對付病毒?相信仍然有待更多研究。至於坊間有傳言話,以精油塗抹於皮膚能抵抗細菌,小編喺度提醒大家,千祈唔好盡信,因為將濃度高嘅精油直接用於皮膚係會導致灼傷、皮膚敏感。要有效防疫,大家都係要先乖乖戴上口罩,勤加清潔、少去公共場所,做足之後,先至以精油作輔助使用。
最後提醒,精油雖然天然,但濃度必須謹慎拿捏,因為精油始終係濃縮嘅植物萃取劑,適量即可,尤其係孕婦需特別注意使用量,可少用但不宜多。用天然方法進行清潔,就能大大減低日常接觸化學物嘅機會,身體自然可以更健康~希望大家都健健康康,繼續守護我哋嘅家。