於秋田縣小坂町嘅小坂鐵道鐵軌公園，佢翻新自原小坂鐵道的終點站－小坂站，於2014年6月正式開業，令早於2009年廢線的小坂鐵道得以用另一種形式重生。車站保留了明治時期風貌，而園內則展示了多輛大正至昭和初期用過的列車，擺明打造成鐵道迷朝聖之地，但若以為只係咁樣已足夠令港女變身鐵道迷，則未免太傻太天真。敞大的園內有數條長約600米的路軌任人闖進，首先已經過到影相呃like呢關，另外更有踩路軌單車、乘坐觀光小火車等多元化體驗，起碼唔係得個睇字咁悶！而園內最大賣點是可以親身上陣體驗開火車，由退役駕駛員喺隔離傍住，開住柴油機關車或除雪車行走約100米路程，其中駕駛除雪車體驗更係全國只此一家，除咗能夠實現唔少鐵道宅的夢想，就連小編都聽到心癢癢囉！
咁大個鐵道公園，有返啲舊車票同舊零件畀大家睇吓是常識吧。
# Blue Train AKEBONO
.
原為行走於上野至秋田‧青森的寢台列車「AKEBONO」，現作為展示車輛及住宿設施擺放於園內，價錢同膠囊酒店差唔多，揀上舖仲可以睇星星，也算是一個特別的體驗。
地址：秋田縣鹿角郡小坂町小坂鑛山字古川20-9
電話：0186-25-8890
營業時間：4月至11月 9:00am-5:00pm、12月至3月 9:00am-4:00pm
定休日：4月至11月 逢星期二至三、12月至3月 平日及年末年始
交通：JR十和田南站轉乘往「小坂」方向的秋北巴士，於「小坂小學校前」站下車，徒步約2分鐘
網址：http://kosaka-rp.com/
#在路軌上奔馳不是夢
前面提過嘅駕駛體驗價錢由5,000日圓起，收費不菲，如果只係想過吓癮、體會吓喺路軌奔馳嘅快感，推薦必玩「路軌單車」。每架路軌列車設有兩個「駕駛席」及兩個「乘客席」，玩法同踩單車一樣，最重要係就算唔識踩單車都玩到，只要對腳掂到個腳踏就無問題！出發後自路軌上瞭望前方，廣闊風景完全無車廂阻隔，撞啱當日更天氣晴朗略帶微風，生活壓力甚麼的都隨著奔馳快感瞬間消失，玩完後略嫌10分鐘實在太短！
成條路軌任你行，沿路除可欣賞曾繁榮一時的小坂站風貌，更可看到部分展示車輛。
以往小坂鐵道主要用作除雪的TMC200型車輛被改裝成觀光小火車，大人細路都可乘搭。
唔打算參加駕駛課程，都可以上去呢架DD-132柴油機關車度扮吓車長，入面有設有前後兩個方向嘅司機位，以DD13型號來說相當罕見。
#行得郁嘅紙皮車！
園內雖然有咁多架列車，但最得女士們歡心嘅肯定係呢架的骰可愛嘅EVOLTA紙皮車！紙皮車由Panasonic同秋田縣立大學共同開發製成，用上特殊紙皮製作，並以99粒EVOLTA 13A乾電池作驅動能源，2014年誕生之初曾經由大館市嘅舊雪澤溫泉站行到去舊御成町，距離都有成8.5KM，相信係日本人至會玩到咁癲！
從靚仔外表上完全睇唔出係紙皮車，估唔到內有乾坤！
無呃人，真係全部都係紙皮整架！
紙皮車雖然有提供乘搭體驗，但就只限最多10位小朋友，大人惟有影吓相當搭過啦。
#穿越紅葉之森
秋田真是一個鐵道迷必到的地方，皆因繼小坂鐵道鐵軌公園後，這裡還有充滿懷舊風情的秋田內陸線！秋田內陸線南起角館站，北至鷹巢站，全長約94.2公里，以一節式車廂悠閒地走過深山溪谷，途中一幅幅紅葉風景於眼前輪流上映，到達主要景點時列車更會放慢行駛速度，這時與其拿起相機瘋狂拍照，相信任誰都會寧願以肉眼細細享受車窗外的美景，體會一下慢活的樂趣。乘搭秋田內陸線的時間要視乎個人需要安排，如果只是想來一趟放鬆愜意的靚景鐵道之旅，並前往下一個景點，則可在阿仁合站上車，再於松葉站下車前往田澤湖、乳頭溫泉等景點，又或直接前往終點角館站，預返一至一個半鐘已經足夠；但如果想在中途落車影相，咁就要預留多啲時間啦！
遍山紅葉的景色，在沿路上一直連線不斷。紅葉觀賞期：10月中旬至下旬開始，各站不同
鮮紅色的大又川橋梁是鐵道迷必影spot之一，想影相的話可在萱草站下車。
途中會經過包括秋田縣最長隧道等多條隧道，於隧道出口可看到鐵道之旅獨有的景色。
車上更有售賣秋田名物小食，好似呢款牛油糯米餅就好啱一路睇住風景一路嘆。
電話：0186-82-2136（阿仁合站）
網址：http://www.akita-nairiku.com/
#秋田名物 比內地雞親子丼
想喺秋田食得好，一定要試比內地雞！比內地雞係日本三大名雞之一，而「秋田比內屋」就係日本首間比內地雞專門店，難得嚟到議食豪少少，揀最高級嘅親子丼套餐，親子丼用上5顆特選比內雞生蛋煮成，肉質札實有彈性的比內雞肉混和香滑的半熟蛋漿，相信無需多餘的調味已足夠滿足閣下的胃袋！
比內地雞親子丼套餐 – 套餐的親子丼以透氣度高的秋田杉碗盛裝，即使白飯放耐咗仍保持粒粒分明。
店內亦可嚐到另一秋田名物「烤米棒」。
地址：秋田縣大館市大町21
電話：0120-701-718
營業時間：11:00am-2:00pm、5:00pm-10:00pm（星期日至9:00pm）
定休日：星期三
交通：JR東大館站徒步約9分鐘
網址：http://www.akitahinaiya.co.jp/
