今次窮人食家去到紅磡明安街，呢度唔係住附近都未必一定識，好多小食店都聚集係呢度附近，今日同樣都係用50蚊睇下餵唔餵得飽我地2個啦！

群昌麵包西餅

芒果糯米糍 $4

糯米糍超多椰絲，幾軟燸，但芒果肉就有啲少，鐘意食椰絲嘅朋友認住佢啦！

芒果布甸 $8

其實我覺得應該叫芒果啫喱，雖然佢外表係奶黃色嘅，但無論食上去定聞落去都係芒果啫喱。

328美食

魷魚條 $7

店家話係必食，但我就覺得未必。我自己其實係第一次食，可能小編同攝影哥哥都唔係太鐘意呢啲滑潺潺嘅感覺，不過呢啲係個個人口味唔同，本身鐘意食魷魚嘅人可以一試。

Thai BBQ

燒豬頸肉 $9

豬頸肉係即叫即燒，要耐心等一等，小編過對面買人個清玉返黎都仲未燒完。但呢個真係幾好食，仲有泰菜外賣，小編對佢個青木瓜沙律好有興趣啊！好多街坊黎買，價錢都好親民。

上海飽餃店

小籠包 $22

呢間係舊式上海小店，門口擺住蒸籠，有個姐姐係度賣點心。有生煎包、小籠包等等上海點心食，小籠包皮都幾薄，不過唔知係咪蒸得太耐，個餡老咗少少，但味道係幾好食嘅，想食就早少少去買啦，佢日日清架，賣完就要等第二日啦。

其實咁食法都抵食，不過下次小編絕對會買咗串燒先買其他嘢食，今次等完個串燒，小籠包都凍曬啦，好彩凍咗都唔差。

今次我地2個就食飽飽啦，你地又有咩小食推薦呢？話比小編知，等我又去試吓！