今日想同大家去行南朗山，超方便，搭地鐵就可以行到，而且非常好行，景色仲好靚，可以睇到深灣、遊艇會同海洋公園，好有香港特色。

我地以黃竹坑港鐵站B出口為起點，落天橋經過巴士總站行上新加坡國際學校嘅路口，轉右繼續沿南朗山道向上行。

好快就會進入單程路，再向前行就會見到上南朗山休憩公園嘅登山梯級。

係短短嘅梯級後就會見到南朗山休憩公園，呢度有座涼亭，已經開始見到少少美景啦，但建議大家上埋樓梯上南朗亭先停低休息。

隨住越行越高嘅梯級，景觀亦漸漸開揚，天上有麻鷹盤旋，遠遠地見到海洋公園嘅遊樂設施，周不時仲傳黎陣陣尖叫聲，全香港應該得呢度有甘嘅奇景啦。

繼續向上行就會見到南朗亭，大家可以係度影吓相，休息一陣；小編上去嘅時候見到有個伯伯守係南朗亭，應該係義務維持呢度嘅整潔，大家記住要自己帶走垃圾啊。呢度景觀好開揚，可以望到深灣、鴨脷洲同南丫島一帶嘅海景。

繼續向上行，沿途左右都有好多地方比大家欣賞風景同影相，大多都好平緩，不過大家都係小心為妙，仲會經過直昇機停機坪，景色都好開揚架！我地係途中仲經過好多石陣，仲有用石砌成嘅椅子，都幾特別架！

繼續向上走，好快就上到南朗山發射站，可以繞發射站行一圈，就可以沿路落山啦！如果時間許可，大家可以留係度睇埋日落。

又或者好似小編咁喺一旁嘅山路落山(量力而為，山路難度比行樓梯難數倍)，可以見到唔同嘅風景。最後係落返南朗山道去返地鐵站又或者去熟食中心食返碟馳名嘅海南雞飯，都唔錯架！

難易度：⭐⭐✨

無令人辛苦嘅鈄路同長樓梯，大量休息位。

打卡度：⭐⭐⭐⭐ 

可以見到深灣遊艇會、香港仔避風塘、海洋公園等等香港特色，有大量地方比人打卡。

設施完善度：⭐⭐ 

基本上無洗手間，但前半段有南朗山休憩公園同南朗亭，有桌椅比大家休息，勁少垃圾桶，係南朗亭都唔見有垃圾桶。