今次窮人食家入到屯門覓食，經地膽朋友推薦，去咗華都商場1樓小食街，呢度雖然唔係啲咩新商場，但都幾多食店，價錢比龍門居、良景親民少少，不過畫風都比較樸實少少。今次小編好好彩買3樣野食都好好食，都夠2個人衣肚，一齊睇吓我地食咗啲咩啦！

新味　日式炸醬撈麵

$50開始倒數

鋪頭入面個姐姐話呢個撈麵醬係醬日式芝麻醬同肉醬炒埋，就甘睇落有啲似譚仔炸醬，聞落好香芝麻味，就甘試個醬都幾咸，又帶啲肉醬香，撈勻食好好味，芝麻味唔算好重，同肉醬完美熔合，正！另外仲可以加幾蚊要杯豆漿或者加餸添！

日式炸醬撈麵 $17

勁の味　墾丁風味炸牛奶

淨返$33喇

小編自己好鐘意呢個炸牛奶，炸到外面脆卜卜好似油炸鬼咁，牛奶餡好香好軟滑，而且唔會太甜，好快已經一粒接一粒食曬啦！店內哥哥話佢係特登去墾丁牧場學整架！想食到墾丁嘅味道就要黎試吓啦！

炸牛奶 $12

板卷 超好食炸軟殼蟹手卷

最後$21點用好？

由於同行朋友都大食，所以Y小編儘量都捺啲飽肚嘢，見到呢間手卷店好吸引，鋪仔細細超多選擇，價錢都好吸引，由於我地用淨21蚊，所以就揀咗呢個炸軟殼蟹手卷，叔叔勁Nice整到個手卷勁靚，佢話呢D係基本嘢，好有自信！一食落口我就明白佢嘅自信係有原因架，因為真係超好食，軟殼蟹炸得啱啱好，連埋沙律醬同壽司飯咬落去，D蟹汁同沙律醬係口入面爆開，又唔會太過熱，配埋微酸嘅壽司飯簡直係掂啊，仲唔會覺得漏，大推！

炸軟殼蟹手卷 $21

食完3樣嘢都夠飽啦，可惜嘅係唔夠預算買埋飲品，但間間小鋪都有誠意之作，得閒可以過黎食吓啦！如果你地都有美食推薦，希望你地可以留言同我開心Share，拜拜！

板卷 ：屯利街1號華都商場1樓65C號舖

勁の味：屯利街1號華都商場1樓

新味：屯利街1號華都商場1樓41號舖