講起元朗,除咗係咪有牛呢個笑話之外,佢嘅美食都係為人津津樂道,早前小編咁啱入咗元朗做嘢,晚餐其實本身想跟網上介紹嘅元朗美食推薦搵食,點知間間都好多人,呢個時候就唯有周圍兜,意外發現咗呢間好味又唔貴嘅水餃店——有得餃。
食完先知呢度粟米豬肉餃好出名,我當日只係嗌咗冬菇白菜豬肉餃、秘製醉豬手、生菜同藥膳雞腳湯。
冬菇白菜豬肉餃好有水準,皮唔會好厚,好紮實嘅餡,冬菇味唔會搶曬白菜豬肉嘅風頭,反而令個餃更鮮甜,如果唔係上網睇我仲以為呢個係招牌嚟!真心好食!下次要黎試吓佢粟米餃先,相信唔會令人失望。
秘製醉豬手又係一樣之後先知原來唔係招牌嘅好菜,其實一入黎已經見到九成嘅食客面前都有一碟雞翼,但我最後都係叫咗豬手。佢整得好入味,小編嘅朋友本身唔好酒都覺得好好味啊!豬手肉軟而不柴,咬落帶酒香;豬手皮滿滿嘅膠原,好高質啊!
出去嗌油菜好怕佢整到油淋淋又軟曬,呢度嘅油菜好清爽,啱曬我呢啲食唔慣重口味嘅人。
最驚喜就係呢個藥膳雞腳湯,飲完毎喉嚨無唔舒服,真係少油無味精,個湯好甜,如果一人一碗夠4個人飲架,但小編當日行咗成日,包辦咗一大半嘅湯補吓腳骨力。如果住附近又懶得煲湯可以試吓呢個湯,性價比好高!
下次小編要再黎Encore佢個湯啊,同埋要試吓佢粟米豬肉餃、雞翼、炸餃同油渣麵先!一間小小嘅餃子店樣樣菜都咁好食真係好難得啊!有興趣去試吓啦!
有得餃
元朗又新街53-59號滿利大廈地下E舖
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like