為慶祝美國歷史最悠久嘅服飾品牌Brooks Brothers踏入200周年嘅重大里程碑,品牌特意於紐約市大中央總站 (Grand Central Terminal) 范德比爾特大廳 (Vanderbilt Hall) 舉辦服裝回顧展。與花旗集團合作呈獻 - Brooks Brothers: 200周年服裝回顧,展出品牌嘅過百年時尚。
回顧展設於大中央總站內嘅范德比爾特大廳,距離Brooks Brothers於麥迪遜大道 (Madison Avenue) 嘅旗艦店只隔一個街區。Brooks Brothers: 200周年服裝回顧展,將展出Brooks Brothers 標誌性嘅男女時裝、昔日發明及創新嘅收藏及照片。
當中包括19世紀嘅西裝套裝及成衣服飾、傳統牛津紡鈕扣Polo®襯衫、斜紋領呔、馬球大衣及融入於日常穿搭嘅運動服時尚。展覽同時探討歷代嘅時裝流行主題及定義,Brooks Brothers喺二十世紀影響著美國大學嘅校園時尚風氣,更曾為多達40位美國總統提供獨特得體嘅服飾,對美國時裝影響深遠。
美國時裝能夠有如此突破性成就,有賴Brooks Brothers多年來革命性嘅創新。Brooks Brothers已成為國際間知名嘅經典品牌,品牌嘅創辦人Henry Sands Brooks係一名出眾並充滿熱誠嘅時裝潮流領導者,Brooks Brothers 多年嚟嘅創新革命無疑奠定咗今日嘅美國時尚風格。
時至今日,大眾或許會視Brooks Brothers為傳統品牌,但品牌創辦人Henry Sands Brooks及兒子絕非拘泥於傳統嘅人。Henry Sands Brooks嘅理念對兒子影響深遠,時刻追求創新突破嘅時裝設計。
Brooks Brothers: 200周年服裝回顧展亦會展出創辦人Henry嘅部份收藏,包括品牌100周年紀念日時聚集嘅剪影及眼鏡,其日記本亦將於展覽中展出,當中內容公開Henry曾向一名朋友Daniel Merritt貸款10英鎊,係最早年Brooks Brothers嘅交易。
品牌主席及行政總裁Claudio Del Vecchio表示今年適逢200周年,品牌特別舉辦一連串慶祝活動!今次展覽向大眾分享200年前喺紐約市開始嘅服裝傳奇故事。Brooks Brothers一直追求創新服裝,來年會繼續帶領大家找尋高品質嘅時裝潮流。
今次展覽亦會重點展示一系列Brooks Brothers經典產品,當中嘅產品徹底改變並定義咗今天嘅美國風格。
展覽嘅中心屹立咗一座18英尺高,並以多達100個LED屏幕組成金羊嘅品牌標誌「Golden Fleece」嘅裝置藝術品,將帶領參觀者體驗品牌嘅視覺之旅。當中介紹到一班著名嘅Brooks Brothers支持者,包括多位荷里活傳奇人物、作家、政治家及藝術家等。
Brooks Brothers: 200周年服裝回顧,將於8月6日至9月5日上午8點至晚上8點,於紐約大中央總站范德比爾特大廳,免費向公眾開放。