唉，做女人真係好多野煩。煩完瘦身就要煩瘦面。而包包面令人最煩惱嘅地方，莫過於就係明明個身唔肥，但人地都覺得你肥肥地咁。尤其係同朋友合照既時候就會出現逼爆MON既情況，小編唯有逼塊臉瘦啲嘅朋友揸機。但解決問題梗係要由根本做起，一齊同小編搵出導致包包面嘅壞習慣，然後努力踢走包包面。

1.生活習慣日夜顛倒

因為生活習慣唔規律、訓覺唔定時、又或者訓得好少既時候，會令身體既淋巴系統運作減慢同令血液循環變差，導致身體內囤積過多水份而無法被排走，就會造成身體水腫既情況，繼而會令臉部出現水腫。

2. 有磨牙嘅習慣

有好多姊妹們都未必發現，自己訓覺嘅時間會出現磨牙嘅情況，而磨牙呢個行為其中一個副作用就係引致包包面。因為會不自覺地用力，從而令嘴嚼肌變大。呢個情況當然係睇醫生，向醫生了解磨牙嘅情況同成因，或者係帶牙套去改善問題。

3. 飲食重口味

飲食唔均衡亦係令臉部出現浮腫既因素之一。如果飲食當中攝取過量嘅鹽份，又或者味道太濃太辛辣，亦會容易導致水份滯留係體內，出現浮腫既現象。除左避免食太重口味既食物，亦應該多食有助增加水份循環嘅食物，例如係紅豆、西瓜或者薏仁（仲可以美白添）。所以飲食清淡啲亦有助減輕包包面架！

4. 經常食「有咬口」嘅食物

牛肉乾同香口膠等食物同樣有機會引致包包面，原理同磨牙好相似，就係經常運用到嘴嚼肌，令嘴嚼肌變大。所以最好食少啲呢類型「有咬口」既食物，戒咗香口膠癮，減少口部運動就有機會改善包包面。

5. 經常托腮

相信好多姊妹影相自拍個陣都試過托住個頭呃LIKE自拍，但其實經常托腮會容易令面部鬆弛，嚴重更會變成左右唔對稱嘅包包面。