甘い媽媽日 Joyful Dessert House

吃 Dining | by Y小編 | 6 years ago

仲有12日就係母親節，為咗慰勞為子女付出一整年嘅媽媽們，由今日起一連12日我地都會同大家分享各種甜甜的美食，等大家可以同媽媽過一個最美好、最甜蜜嘅甘い媽媽日❤

Joyful Dessert House係旺角同銅鑼灣都有分店，旺角分店連續多年獲得米芝蓮街頭小食推介，主打西日式甜品。係店主嘅精心研發下，推出唔少啱香港人口味嘅美味甜品，大受歡迎。呢度嘅甜品甜而不漏，食落唔會覺得好heavy，甜味同食材嘅原味配合得剛剛好，啱曬平日喜歡下廚嘅媽咪。

梳乎厘系列伴雪糕口味：雲尼嗱/Baileys/朱古力/薑汁/橙酒 $54-$56（需時約12分鐘）

梳乎厘入口即化，伴隨微微嘅香氣留於口中，溫柔得令人回味。大家可以根據喜好選擇口味，為呢一份溫暖嘅口感帶黎多重變化。

法式焦糖燉蛋伴雪糕 $52

薄脆嘅焦糖覆蓋於軟綿嘅燉蛋之上，焦糖燉蛋最忌諱蛋太甜，焦糖太厚。呢一間嘅焦糖同雞蛋嘅甜度同口感都配合得啱啱好，焦糖即叫即燒，上枱後大家唔好掛住影相，趁熱食先係最好食架！

拿破侖系列口味：芒果/藍莓/士多啤梨/朱古力 $64

拿破侖系列係Joyful Dessert House嘅招牌之一，今次小編就試咗芒果拿破侖。三層鬆脆嘅酥餅夾住幼滑嘅吉士，鋪上鮮甜嘅勁靚菲律賓呂宋芒，酸甜嘅果肉同拿破侖配合得天依無縫。隨碟伴上意大利進口芒果雪糕，如果媽媽喜歡食芒果，一定唔好錯過呢碟金黃嘅芒果盛宴。

芭菲系列口味：芒果七色椰果/宇治金時/藍莓乳酪/沖繩黑糖Oreo/紫薯香芋 $64

講起日本嘅西式甜品就一定唔少得芭菲，小編自己去日本都食唔少，今次試咗呢個紫薯香芋芭菲，香軟幼滑嘅紫薯蓉同香芋雪糕，加上忌廉同脆脆，層層疊疊總共11層！就咁睇上去已經可以喚回媽媽嘅少女心，一路傾計一路同媽媽食雪糕，同媽媽做對Bestie！仲有好多唔同口味選擇，一人叫一隻味Share食更加開心！

Joyful Dessert House每季都會以季節食材研發季節限定甜品，小編收到風黎緊佢地會推出西瓜系列，以清涼嘅西瓜為大家消消暑，記住密切留意啦！