日本人氣一番過江龍一幻拉麵首次登陸香港，係4月11日於灣仔隆重開幕！「一幻拉麵」於2009年由總店長林直樹先生於北海道札幌創立，以香濃嘅無敵甜蝦湯底於短短幾年後俘虜日本國民同旅客嘅心，仲係台灣同印尼開咗海外分店，人氣爆燈！
 

咁出名嘅北海道名物，Homita梗係唔會錯過啦！一幻拉麵最出名嘅就係佢香甜濃郁嘅甜蝦湯底。等小編直擊廚房，揭開呢個湯底嘅秘密！拉麵師傅每次以15KG加拿大甜蝦頭去熬製湯底， 每鍋湯底都熬足足4小時，要用成60KG嘅甜蝦先足夠應付一日嘅份量！唔怪之得佢嘅蝦湯底遠近馳名，真係真材實料㗎！

但要令到一碗拉麵升級至神級美味，又點止係蝦湯咁簡單呢？每一碗拉麵都係即叫即整，係熱鍋中加入秘製蝦油、豬油、蒜蓉同薑蓉爆炒，然後先加入新鮮濃厚嘅蝦湯同湯頭。店方仲特別選用方形麵餅，可以更好地掛湯，提升蝦湯拉麵嘅獨特風味。

招牌蝦湯麵 $88

客人可以根據自己嘅口味去選擇自己喜愛嘅拉麵，店方提供3種湯底包括純蝦湯、適量豚骨蝦湯同濃厚豚骨蝦湯；調味亦可以揀鹽味、醬油同味增3種；亦都可以自以揀粗麵或者幼麵，組合多達18種之多！每碗拉麵均附上一片叉燒同半隻糖心蛋，奉客前更會加入帶紅薑風味及蝦味嘅脆脆蝦味麵酥同埋熬煮過後嘅蝦頭製成嘅蝦粉。小編最愛嘅搭配係純蝦湯鹽味粗麵，鹽味嘅調味唔會搶咗蝦湯嘅風頭，粗麵可以更好地吸收甜蝦嘅鮮味。

煎餃子 $35

蝦味飯糰 $20

一幻叉燒飯 $45

除咗招牌蝦湯拉麵之外，店鋪仲有蝦味飯糰、餃子同海外限定嘅一幻叉燒飯！日式叉燒切成小件，加入麵酥、青蔥及少許秘製辣椒醬提味，淋係香軟嘅飯上面，一碗令人大滿足。

小編今次黎除咗自己食，又點會唔記得大家呢？今次我地就為大家帶黎免費飲物優惠，由2018年5月2日至2018年5月8日期間，凡惠顧「一幻拉麵」招牌蝦湯麵嘅朋友，只要讚好我地Homita同一幻拉麵嘅Facebook專頁，完成後出示予店員，每人就可享用一客免費汽水/烏龍茶。

一幻拉麵
地址：香港灣仔皇后大道東119號B店
電話：＋852 2789 3799
營業時間：11：00-23：00