久違地，攝哥哥同恩恩去咗長洲。嗯，又係因為我要去睇櫻花⋯⋯詳情可以睇長洲櫻花開咗啦！颱風過後依然堅強盛放，雖然無上年咁大棵，但佢係一棵有故事嘅櫻花，我相信佢會再次變成又大又健康嘅櫻花樹架！

講返正題，黎親長洲梗係要掃街，今次我就想同大家分享平時我地入黎會買咩黎食，Let's go！

恩恩黎親長洲必食！如果一定要係大魚蛋同正常魚蛋揀一樣，我一定會揀呢度嘅炸白魚蛋。呢度嘅白魚蛋超級彈牙，絕對係將出面機整嘅魚蛋比下去！正！

炸魚蛋 $15

四寶丸其實係五寶，呢度出品嘅炸丸係絕對有保証！尤其是攝哥哥同恩恩呢啲唔好魚類食品嘅人都可以將鯪魚丸放入口，食落一啲腥味都無，反而好大陣陳皮味，但又唔會覺得衝突，入面仲有粒粒章魚，好食！

炸四寶丸 $15

入長洲梗係要食芒果糯米糍啦！唔知點解，長洲嘅芒果糯米糍真係特別好食！係度嗌返杯檸檬綠茶，一啖糯米糍一啖檸檬綠茶，好正啊！

軟糯嘅皮帶D椰子味，包住大大塊芒果肉，果然長洲芒果糯米糍係最好食架！

芒果糯米糍 $15

唔好睇佢奇貌不揚，綠茶味好清香架，雖然佢同張相係差得有啲遠，但味道係同想像一樣好嘅。

檸檬多多綠茶 $11

呢間小店我第一次黎係買手卷食，但發現好多人都黎食紅豆餅，又真係唔錯喎！我地係白色情人節去嘅，閒日仲要落雨，但都有好多人黎買紅豆餅，你就知佢幾好食啦！

.

其實芝士紅豆餅同紅豆餅個樣係一樣嘅，我自己就鐘意食原味，因為覺得咸嘅芝士同甜嘅紅豆夾埋有啲奇妙嘅感覺；不過我見唔少女仔都買咗芝士味，口味呢家野，真係人人唔同，不過多人食就真嘅。

好味紅豆餅，芝士紅豆餅 2/$18

呢個係攝哥哥推介，間鋪假日仲會賣埋焗帶子，睇落好吸引。

由於恩恩係麻麻地蠔嘅，所以我無食。但攝哥哥話比佢印象中嘅芝士焗蠔味道差咗少少，不過啲Filling都幾多幾好食，但蠔肉⋯⋯恩恩睇到都覺得有啲細舊，可能係攝哥哥唔好彩㨂著舊袖珍蠔肉掛。

芝士焗蠔 $25

識我嘅朋友都知我最鐘意食西瓜，所以黎到點可以唔去搵西瓜食呢？呢度仲除咗西瓜冰仲有菠蘿冰，都好好味架！

拎住大個塊面嘅西瓜冰行係街度超型啊！個個都用羨慕嘅眼神望住我，仲有唔少人問我係邊買，突然好受人歡迎添，嘻嘻！西瓜一入口唔會好甜，會隨住你越食到中間越甜，都唔會冰到咬唔郁，唯一一樣就係食到最後會有少少不知所措，要「Tun」出個西瓜先食到。不過真係好好食，夏天食仲正！

西瓜冰 $18

今次我地就食到呢度，你地去長洲又會食啲咩呢？留言話我知啦！bye-bye！