今次我地就黎到元朗民合徑睇下有咩好食,唔少街坊同學生都會係度掃街,價錢都好親民架!睇下我地用50蚊食咗啲咩啦!
巴打小食
薯格 $13
份量都幾多,即叫即炸,又唔會好油,仲可以因應自己喜好落唔同醬汁同調味粉。鋪名好得意,幾食字,加油啊!
風味小食
百香果綠茶 $11
非常之甜,應該係用糖漿沖開嘅,無乜茶味。老老實實小編覺得呢杯野有啲貴,係葵芳呢杯野應該8蚊左右埋到單,不過比起同區其他地方呢個價格叫做合理。
百味香美食站
香脆腐皮豬肉卷$11
賣相唔係非常討好,不過食落又幾好味,外面係炸脆嘅腐皮包住好似魚蛋口感嘅豬肉腸,如果粉嘅比例少啲應該會更好食,小編第一次食到呢類食物,都幾特別,如果佢有得點泰式辣醬就好啦,應該更好食。
滷水雞脾 $ 15
呢度嘅滷水雞脾幾平,但係佢係以微波爐加熱,小編有少少失望。不過肉質又唔似係微波爐質感,都幾嫩。如果可以更入味就好啦!
今次我地雖然冇話食到啲好驚喜嘅野食,但見到一班同學仔同街坊係度食得咁開心,我地都食得好幸福,親民價加上人情味先係呢度嘅重點。今次我地2個就食飽飽啦,你地又有咩小食推薦呢?話比小編知,等我又去試吓!
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like