繼第一日去咗綾城之後，第二日同學仔嘅行程黎到宮崎市中心東南方嘅連島沙洲，青島之上嘅青島神社參觀。青島神社可以講係宮崎必去景點，除咗因為佢係非常靈驗嘅戀愛神社，仲係因為呢度有著名嘅大自然景觀「鬼之洗衣板」，一個地方兩種玩法，係老少皆宜嘅景點。

青島神社亦有姻緣之社稱，吸引大批信眾前往求姻緣。

繪馬都係心型架！

有同學仔就影到之前香港人黎到許嘅願望，隔咗３個月都仲健在，無比人破壞到～

同學仔佢地一大清早喺酒店食完早餐之後，一行三十幾人沿住岸邊，行去呢個連島沙洲-青島之上嘅青島神社參觀。跟據最早喺國司巡視記“日向土産” 上嘅記載，神社裡面供奉咗「彥火火出見命」、「豐玉姬命」及「鹽筒大神」三位大神，分別為結緣、順產與家庭健康以及海上安全等提供庇佑。

青島同宮崎嘅陸地只有一條彌生橋作為連接，因為青島位於宮崎以東，只要夠早出門，就可以喺去程嘅時候欣賞日出美景。過咗橋之後，就會見到被樹林覆蓋嘅青島。

鳥居亦係打卡熱點。

沿岸右邊有一條小路通向神社，鳥居就正正起喺海邊石灘之上。呢度每年都會喺成人日「裸之祭」舉行活動，不同年齡層嘅男女都會用冰冷嘅海水清洗身體再去參拜，體現出自然同信仰融為一體。

青島神社亦係日本本土少數具有「亞熱帶風貌」嘅神社。青島由於受黑潮影響，氣候溫暖多雨，故此亞熱帶植物茂盛，島上有近5000棵蒲葵樹，包圍整座神社，最老樹齡達350年，係日本國家指定特別天然紀念物。置身島上，你會有一種「椰林樹影、水清沙幼」嘅感覺，如果唔係見到座神社，仲以為自己去咗馬爾代夫添！

喺神社本殿旁邊有一條叢林小路，穿過一個被高大蒲葵包圍嘅樹林，就會見到有一塊空地，正中央有一個叫做「元宮」嘅小型祭壇，據說呢個位置係整個青島正嘅中央。元宮後面仲有一個地方可以俾善信擲陶碟去消災解厄。

神社所在嘅青島仲有一個一定要睇嘅大自然奇觀：「鬼之洗衣板」。肉眼所見，一整片沿岸地區就好似一塊洗衫板咁，海灘嘅岩石上面有一條條斜坑紋平衡咁露出水面。原來係因為喺海浪嘅侵蝕下，露出嘅砂岩同海床嘅泥岩令海邊嘅岩石逐漸出現摺疊同坑紋，經年累月磨蝕之下形成今日見到嘅奇觀。

*行程由Asian Studies HSUHK 提供

青島神社
營業時間‎: ‎8:00～17:00    
地址‎: ‎宮崎県宮崎市青島2-13-1（Map code：843 ...
門票‎: ‎免費    
電話‎: ‎0985-65-1262