今日小編想同大家介紹呢間全日本有11間分店、開到美國都有2間分店嘅牛肉飯Red Rock。今次恩恩好朋友露比就去咗原宿分店，食完大讚好好食，等我地一齊睇下呢間烤牛丼店有幾吸引。

其實小編自己都行過幾次，佢係原宿BEAMS隔離，但因為小編唔願意去排隊(因為好多排隊都係名大於實)而錯過咗呢間超好食嘅烤牛丼。「レッドロック（Red Rock）」以堆到成個小山丘咁嘅烤牛丼而打響名堂，價錢仲非常之大眾化！唔止原宿店、神戶總店以及全國多間分店都日日大排長龍，不論係日本人定旅客都趨之若鶩，簡直係國民級美食！

今次露比就試咗兩個招牌烤牛肉飯同牛排飯，其實應該多數人第一次食都係呢2樣之一架啦！「超正！」「 啲汁好好食，牛肉生熟啱啱好！好軟熟！撈飯食正到爆炸！！！！」小編睇完佢啲食後感都好想即刻飛去食啊！

唔止露比好朋友，連Wyman為呢間Red Rock係日本留多一日，就係為咗排隊食佢嘅牛肉丼，真心見到張相已經流晒口水啦！

值得開心嘅係！今次小編得知原宿店條龍冇之前甘長啦，大約３—４個字就排到入去（不過有可能係咁岩好彩），野食都上得好快，所以唔洗花好多時間就可以食到呢間大件好美夾抵食嘅牛丼，有假就即刻買機票去日本食啦！

餐廳：RedRock (レッドロック 原宿店)

地址：東京都 渋谷区 神宮前 3-25-12 フジビル B1F

電話：03-6721-1729 (+81-3-6721-1729)

營業時間：11:30—22:00(L.O)