之前係Facebook都有提過，小編自己都有為親朋好友訂口罩返黎，夾夾埋埋都過二千盒，今次小編就同大家分享一吓買印尼口罩嘅成本，大家要齊心杜絕炒價！

首先要同大家講，小編唔係叫商家唔好賺錢，只係深感口罩呢啲必需品，小編呢D小蕃薯都成功開到團以較相宜嘅價錢買到，唔希望商戶將必需品炒得太貴，要全民帶得起口罩先有用架嘛！

大家如果想要知印尼口罩成本，可以上印尼嘅網上購物平台去搜尋，如Tokopeida、Lazada等等，輸入「Masker 3ply」，比小朋友用就再加「Anak」，就可以搵到唔同嘅口罩，最靚嘅款會係Nexcare同Anytime等國際出口大品牌，價錢都相對比較貴；如果一般市面上見到嘅，依家兌返港幣大約係130-180蚊一盒不等。不過小編入貨嗰陣，分別係講緊約26蚊、40蚊、80蚊一盒50塊，去到最近係19蚊5塊一包，只感嘆炒賣力強勁啊！不過都有聽朋友講，如果搵到廠可以做返1蚊張左右（連運費）嘅價錢，但小編自己就無再搵啦～

至於運費，小編為咗足不出戶，係分別使用咗Fedex、Ups等國際大運輸公司，亦都用過印尼嘅運輸（現已停收口罩），由於口罩係計體積重，價錢都唔低，除返開運費要30-45蚊一盒。而小編亦有朋友用咗印尼集運，係銅鑼灣等集貨點取貨，就相對平好多，圍返運費唔洗十蚊一盒。

小編一共入咗4次印尼口罩，全部都唔係同廠訂，而係搵熟人喺網上同藥房幫我喺印尼一間間購入再寄返香港。由第一次連運費約1.3HKD一張去到最後次炒到約3.8HKD一張（全部少量寄國際速遽公司），成本一定係喺4HKD一張以內，所以大家如果見到有賣家賣超過300蚊一盒，就好有可能係比人炒多過1倍利潤啦！

不過以上價格只供參巧，小編唔排除有商人以貴於市價會錢入貨轉售，只係想提提大家，買炒價口罩前停一停、諗一諗，唔好助長炒價啦！