今日小編我地黎到元朗福康街一間叫食28嘅小店,呢度嘅主食多數都係賣28蚊,可能係咁先會有食28呢個店名。今次依然係用咗50蚊2人同行,雖然只係叫咗一個主食,但都好夠食啊!
魷魚蝦枝 $12
呢個魷魚蝦枝係用一層麵粉皮包住一條魷魚一條蝦再拎去炸,尖尖長長咁,小編第一次食。味道咸香,帶胡椒味,不過蝦肉就少咗啲。呢啲香口嘢買返屋企煲劇一流啊!
迷你粟米薯餅 $10
其實即是可樂餅,10蚊3個,入面係忌廉薯蓉加粟米,超級多粟米粒,非常討好喜歡食粟米嘅我不過薯蓉就可以再軟滑少少,冇日本食嘅咁Creamy,以呢個價錢黎講好抵食!
手撕雞冷麵 $28
登登登登!小編就係為咗呢個冷麵而黎架啦!攝影哥哥話佢想食咗好耐,因為聽人講話好好食!果然佢真係正中小編胃口啊!佢一盒入面包咗冷麵同沙律,冷麵嘅份量仲好多添!手撕雞冷麵用嘅醬汁好重芝麻香;沙律汁呢都係芝麻醬但更酸甜,用佢黎撈麵都得架!手撕雞好滑,同醬汁好夾,值得大家一試再試!
今次窮人食家係咁多,你地又有咩小食推薦呢?話比小編知,等我又去試吓!
食28
地址:福康街10號地下A舖
營業時間:11:00-21:00
Tags: Homita窮人食家, 元朗狂食
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like