號外！號外！日本「千里屋食堂」新鮮滾熱辣黎到香港，誓要滿足港人味蕾！而家唔使去到大版，都有機會品嘗到由日本空運到港，被稱為係世界上最好、肉汁最多、脂肪分布得最均勻嘅鹿兒島黑毛和牛啦。
「肉工房千里屋」創立於1991年，歷史悠久，到而家已經擴大成大版當地嘅肉類專賣店，所售賣嘅肉類更係樂天市場網站上連續兩年獲得銷售量冠軍。今次，千里屋集團千里迢迢黎到香港開辦首間駐港食店，以黑毛和牛為主要食材，經料理長別出心裁地烹調各款菜式。事不宜遲，即刻睇下小編嘅試食報告啦！
火灸珠峰 （定價為$189;期間現定可享以優惠價$159食用）
首先試食嘅係「千里屋食堂」最signature嘅火灸珠峰（Mt. Everest DON）。塔近四寸高嘅澳洲黑牛塔吸睛度極高，以上層肉質鮮嫩、味道清淡嘅牛腰肉配以多油分、超juicy嘅牛小排，從上而下進食，達至由淡至濃嘅味道，再加上脆卜卜嘅蒜片，令味道瞬間昇華至更高嘅層次，口感好幸福喔～
薰月·馥漫堂（定價為$129;期間現定24/2至2/3可享以優惠價$99食用）
另一款係薰月·馥漫堂（Cube DON) 。料理長特意選用牛腹中最軟熟嘅部分烹調，用十種不同嘅香料醃製後製成半封乾，再以60度低溫烤製，利用而家日本最流行嘅處理方式將牛肉切成一粒粒，方便入口之餘亦更易入味。不得不提嘅就係千里屋嘅特製醬汁，甜得黎又唔太濃郁，唔會搶走肉汁嘅鮮味，絕對係黑牛嘅perfect match！為左滿足一眾好牛一族，餐廳特設三個size俾客人選擇，分別有並盛，大盛（並盛嘅1.5倍）同特盛（並盛嘅2倍），希望客人能夠大飽口福。
西冷牛扒（定價為$480;期間現定9/2至15/2可享以優惠價$190食用）
輪到主角出場啦！「千里屋食堂」特意選用鹿兒島黑牛嘅西冷牛扒（Sirloin steak）同夏多布里昂牛扒（Chateaubriand steak）作為主要食材。料理師將粉嫩鮮肉放上鐵板燒至半熟狀態，鎖緊肉汁之餘又能保住原汁原味。日本人認為唔加調味料進食牛肉先至係最佳食法，所以料理長建議大家只需點少少wasabi同粗鹽就可食用。
夏多布里昂牛扒（定價為$480;期間現定17/2至23/2可享以優惠價$99食用）
咁多款牛扒中，小編最鐘意嘅一定係夏多布里昂牛扒，佢屬於牛腰部分，係牛肉中最高柔軟度嘅地方。啱啱上枱，就已傳黎陣陣肉香，放入口中，肉質仿如牛油般細嫩，入口即融，瞬間征服左我嘅味蕾。聽店員講，原來每400公斤嘅牛先得300克牛腰內肉，簡直就係彌足珍貴，能夠已經濟實惠嘅價錢品嘗到臻美極緻嘅鹿兒島黑真係千載難遇嘅機會啊！
料理長體貼到各位食客嘅需要，如果食唔慣五成熟，不妨可以反映俾店員聽，叫廚師煮熟啲。店員仲透露，黎緊餐廳會陸續推出午市及晚市燒肉套餐，仲會提供燒酒同啤酒俾客人搭配牛肉食用，務求令各位饕客齒頰留香，有著一試難忘嘅體會。
「千里屋食堂」將於2018年2月2日係銅鑼灣正式開幕，皆於店內只設有26個座位，現時仲未有訂枱服務，想率先以貼地價錢試食嘅朋友就早啲去排隊啦！
地址：銅鑼灣駱克道447至449號中威商業大廈地下2號
