今期流行VR打機睇戲，但邊個話得後生仔至可以玩VR！擁有400年歷史嘅弘前城就話要玩埋一份，整咗個VR導賞團，係日本首個將VR技術應用於觀光上嘅地方，共設有追手門、弘前城天守等5個觀景點，行到埋去後只要戴上VR眼鏡，即可720度無死角睇盡同一位置嘅冬、春季景色，而今後更會陸續加入秋、夏季映像，以後想一次睇勻四季靚景仲邊有難度！其實弘前城除咗係國家指定遺跡，亦由於弘前公園內種滿櫻花樹及楓樹，而同為賞櫻名所及紅葉勝地，甚至連雪景都靚過人…以往每次只能三揀一要含淚抉擇，真係一早就應該要有呢個VR團。可能你會話咪又係用虛擬實景嚟自欺欺人，但對於在秋天到訪弘前城嘅小編嚟講，戴上眼鏡後睇到一片櫻色，係感動嘅！

弘前公園內種有約2600棵的櫻花樹，每年吸引超過200萬遊客賞櫻，怕同人逼就揀其他季節嚟用VR眼鏡睇啦！

冬日的弘前城舖上一層白雪，獨立在銀白世界中顯得有點蕭瑟，與春天相比又別有一番風味。

拱橋中間係其中一個check point，亦係觀望弘前城嘅最佳位置，可惜天守附近並沒有太多紅葉。
地址：青森縣弘前市下白銀町1
開放時間：4月1日至11月23日 9:00am-5:00pm、櫻花祭期間 7:00am-9:00pm
定休日：弘前城 11月24日至3月31日（弘前城本丸・北之郭於期間內免費入場）
交通：JR弘前站轉乘巴士，於市役所前站下車，徒步約4分鐘
網址：http://www.hirosakipark.jp/

有種蘋果，係要扭出來
去青森唔食蘋果猶如無去過，更何況而家正值蘋果季節，一日一蘋果都未必夠數。想瘋狂食蘋果有好多選擇，不過貪心如小編想要又食又玩，就只能揀屬星野Resort的青森屋喇！講「住」，叫得做resort嘅青森屋有靚房靚景靚溫泉，當然無嘢令人擔心，只係講到「玩」，就未免有太多驚喜了！唔知係咪青森屋深知自己附近便利店都無間，所以每隔三個月就會準備不同嘅豐富節目畀住客，即使只係「食蘋果」咁小事，都特地安置日本首部「蘋果扭蛋機」，裡面有富士、Toki等好幾款蘋果，睇見忍唔住扭咗3次，至發現要儲齊一套真心唔易！扭蛋機隔離更有個水龍頭，千祈咪以為係食完蘋果洗手用，實情係蘋果汁嘅自由斟，好味到包你飲完返唔到轉頭。飲飲食食之外，仲有巨型蘋果花燈、300個蘋果掛燈等佈置，以及釣扇貝、扇貝繪馬等玩意，如果無返咁上下精力認真唔夠佢玩！

100yen扭一次，食到邊款蘋果完全睇運氣！

咁巨型嘅扭蛋都係第一次見！

蘋果汁可以任斟，但每日斟晒就無，所以斟還斟，都要記得留返啲畀其他人呀～

釣到嘅扇貝可以即場叫師傅燒嚟食，當然釣唔到都會畀返同等價值嘅扇貝啦！收費：1,080日圓 / 5分鐘

房間十分寬敞乾淨，最啱玩完成晚好好休息。

晚飯時間有包括睡魔花燈等青森四大祭表演睇，更可參加跳人體驗同表演者、其他住客大跳祭典舞蹈，氣氛熱鬧非常！但要留意想喺晚飯時睇騷就要事前於訂房時揀埋！
地址：青森縣三澤市字古間木山56
電話：0570-073-022
入住時間：Check in 3:00pm、Check out 12:00am
語言：日文、英文
交通：JR八戶站轉乘酒店接送巴士約40分鐘
Wi-Fi：全館客房及大堂均有免費Wi-Fi提供
網頁：http://noresoreaomoriya.jp/