香港係日本第四大旅客來源，唔少香港旅客喺日本嘅「晚間活動」，必定係去逛逛24小時營業嘅 驚安の殿堂ドン・キホーテ（ 驚安之殿堂／DonDonDonki／唐吉訶德）。香港首家驚安之殿堂分店，現時正進行貨品擺放等最後準備，將於周五（12日）早上10時正式開幕！作為唔少遊日旅客嘅必到手信舖之一，相信唔少人對驚安之殿堂登陸香港也感到十分期待。

尖沙咀店位於尖沙咀美麗華2期地庫B1 ，該舖曾被時裝品牌Collect Point租用，佔地超過1.6萬呎，喺the One商場及美麗華商場中間，屬彌敦道黃金地段，人流極旺。

驚安之殿堂現時於新加坡、加州及夏威夷都設有海外分店，曼谷分店亦即將開幕。新加坡同曼谷嘅分店都如日本一樣，會24小時營業。雖然暫時未知驚安之殿堂尖沙咀美麗華店會唔會24小時開放，但留意招聘廣告，小編發現除咗普通店員同收銀之外，仲有廚師、壽司刺身處理員、肉類分割員等處理新鮮食品嘅職項，睇嚟香港激安殿堂唔單止係普通嘅激安殿堂，而係「MEGA版」嘅激安殿堂！

日本激安殿堂有分普通店同MEGA店等類型，較為人熟知嘅MEGA店有位於東京嘅澀谷店以及北海道嘅札幌狸小路店。MEGA店相比普通店較為寬敞，顧客唔使擠喺普通店狹窄嘅空間，可以舒服地選購貨品，因此MEGA店更適合一家大細男女老幼一齊去購物。此外，MEGA店亦會販賣普通店唔會販賣嘅新鮮食品。

香港激安殿堂共有12個部門，包括食品類及非食品類，食品類包括壽司及海鮮刺身部門、肉類部門、熟食部門和立食部門等；而日式雜貨、藥妝、家居精品部等部門亦會同時登場。睇嚟今次完整無缺咁將激安殿堂帶到香港，終於唔使山長水遠去日本買，好快就可以去香港分店掃貨啦！

激安殿堂香港官方Facebook專頁上更有介紹Donki日式料理廚房，表明食品部有壽司、海鮮刺身、肉類熟食和立食等，片段中能清晰看到多種食品選擇，如有網燒粟米、炙燒壽司、蛋包炒麵、章魚燒和吉列豬扒，飲品更有抹茶奶昔，多數是日式小食，看來將會成為掃街新熱點！

驚安之殿堂攻佔尖沙咀美麗華酒店地庫後，亦將進駐荃灣西站大型商場海之戀商場OP Mall！長實地產投資董事黃思行透露，有日本連鎖雜貨店已經承租5萬平方呎樓面，暫時係商場最大租戶，而商場亦會有美食廣場。市場傳出，上述日本連鎖雜貨店就係驚安之殿堂。如消息屬實，驚安之殿堂本港第二所分店面積將較尖沙咀店大三倍，仲有埋美食廣場，以後想shopping食宵夜又多一個選擇啦！有傳海之戀分店會於年底開幕，趕上聖誕節旺季。

臨近尖沙咀店開幕，驚安之殿堂將會有一系列嘅開店優惠同活動，請密切留意激安殿堂香港官方Facebook專頁~

https://www.facebook.com/DonDonDonkiHK/