平時小編成日上深圳廣州玩,寫咗唔少介紹,但其實近近地仲有一個地方都好靚,好有文青氣息,就係廈門啦,小編同大家整理咗幾個景點,只要錯開五月同十月嘅黃金周,其實都可以輕鬆去遊玩喔!
#南普陀寺
南普陀寺免費開放,呢度超多遊客,門口有香可以領,大家可以係度逛一下,但小編主要係講呢度附近有好多小店,大家可以去尋寶啊!
#萬石植物園
其實呢度之前小編有介紹過,門票RMB40,學生證半價,下午2點至4點熱帶雨林區會有噴霧,影相超靚!
唔少人都會黎呢度婚攝,一定要看準時間去哦!建議大家如果為影相去,可以準備多一套衫,除咗因為出汗要換之外,仲因為呢度仲有超大嘅仙人掌園,一次影到唔同風格嘅相!詳情請睇:
廈門遊樂團 打卡一日係行唔曬架 萬石植物園
廈門仙人掌園 沙漠Feel風格圖無難度!
#曾厝垵
建議夜晚去掃街,基本上全部都係各種小吃,好熱鬧,呢度都有好多手信,不過似乎比其他地方貴咁少少,勝在一次過採買比較方便。
#鼓浪嶼
鼓浪嶼可說是廈門最出名嘅景點之一,去鼓浪嶼至少要提前三日係微信公眾號或者官網上定船票,RMB35來回,終點選擇三坵田碼頭就可以直接到景點附近啦!到步第一件事就要去手信店買本蓋章薄,可以係度蓃集到各式各樣唔同嘅特色印章~風琴博物館、鋼琴博物館可以免費參觀,仲有好多文化遺產建築需要買票入場,如果你係學生一定要帶學生證買半價飛啊!最美轉角同轉角遇到愛嘅拍攝地都可以打卡,不過注意呢度人非常多,大家最好有心理準備影相要速戰速決。
鼓浪嶼都唔少網紅美食:張三瘋奶茶,趙小姐的店,糍粑同魚丸都唔錯架!返程要排好耐隊上船,可以坐去中山街附近嘅輪渡碼頭,夜晚就可以直接去中山街行啦!
#沙坡尾
沙坡尾係一個藝術街區,如果你係文青系朋友一定會喜歡呢度。廈門文藝氣息好重,比深圳廣州更多文青熱點喔,就算你本身唔係一個好有文青氣質,都不妨黎體會一下廈門嘅文化風氣啊!
#世貿雙子塔
就係沙坡尾附近,係度可以玩空中漫步,係塔頂俯瞰廈門全景,小編表示怕怕。
#環島南路音樂廣場
大家可以係度租架單車黎環島路騎行,天氣好嘅話仲可以見到粉色夕陽,真係好靚!
#廈大芙蓉隧道
芙蓉隧道只有晚上對遊客開放,入面全部都係學生對廈大嘅回憶,超青春!呢度超多人,大家要排隊先可以影相喔!不過其實廈大附近仲有好多文青Cafe,本身大學入面都好靚,建議黎飲個下午茶,再行下廈大,先去芙蓉隧道打卡。
#吉冶百貨
廈門同台灣一樣,都出名閩南食品,小編之前介紹過呢間阿吉仔餅鋪,雖然唔可以講佢係最好食,但真係好靚,手信一流!最主要係呢度超有懷舊氣息,又係打卡嘅時候啦!
#泡泡屋
泡泡屋絕對是網紅拍照聖地,係度可以見到超多花枝招展嘅女仔係度影相打卡,如果你都想係度影相,一定要早少少去,除咗因為人多,更多係因為呢度中午時間真係好熱,唔想個妝花晒就要早起了!
#貓街
貓街唔大,有一間貓咪博物館,不過腦奴們一定要去睇啊,全部都係貓,超可愛~ 附近都有唔少小小店舖,間間都好多特色,有興趣可以慢慢一間一間逛逛。
#白城沙灘
去到咁和暖嘅地方點可以唔踏下浪呢?白城沙灘就係一個好去處,隨便影都有熱帶旅遊嘅感覺。
#Thank you Cafe
小編真心推薦Thank you Cafe,打卡一流,店外店內都好有Style,食物都唔錯,價錢唔算貴。呢度日頭係Cafe,夜晚係酒吧, 日夜不同風情。食完仲可以慢慢行去附近商場或夜市行街,超方便。詳情請睇:
圖片來源:google圖片及小編自攝