正值士多啤梨當造嘅季節，商舖都不約而同地推出各式草莓甜食，無論係種類或係配搭都好豐富！日本Cafe Morozoff最近就喺全國分店推出咗春日期間限定草莓餐目，其中草莓與布丁組合最令人驚喜，作為草莓控嘅你一定要試！

いちごのプリンパフェ　1,100円(未連稅)
展開期間：2019年3月1日(五)～5月6日(二)
底部鋪滿咗濃厚嘅草莓雪糕、香味嘅草莓醬，中段就係以朱古力碎蓋住嘅香橙啫喱，而頂層就係滿滿嘅香草雪糕、奶油，再由片狀嘅草莓圍住放置喺中間嘅布丁~微酸嘅草莓與温和甜美嘅布丁味道合襯，絕對會為你帶嚟全新嘅甜食樂趣！

いちごとラズベリークリームのワッフル　1,200円(未連稅)
※附有咖啡或紅茶
2019年3月1日(五)～5月31日(五)
喺Cafe Morozoff極具人氣嘅窩夫餅亦都出咗春日版本，樹莓醬與士多啤梨朱古力組合成忌廉，帶出春意濃郁嘅感覺，再配合伴於碟邊嘅微酸莓果一齊享用就完美啦！

期間限定デザートプレート　1,150円(未連稅)
※附有咖啡或紅茶
2019年3月1日(五)～5月31日(五)
加入士多啤梨雪糕嘅迷你水果芭菲、焦糖布丁、丹麥忌廉芝士蛋糕一次過出現喺茶碟上面，等你可以一次過品嚐三種甜食，唔洗揀之餘，仲可以保持味道上嘅新鮮感～

いちごのショートケーキ　1,250円(未連稅)　
※附有咖啡或紅茶
2019年2月15日(五)～4月26日(五)
第一眼睇落似乎同成日都見到嘅士多啤梨短蛋糕無咩分別，其實內有驚喜！蛋糕特物用咗入口輕柔即溶嘅北海道產忌廉，並且要配合奶香味濃嘅英式奶油醬一同享用，所以味道上亦同常見嘅版本有所不同。