嚟到三月，櫻花季節迫近啦！日本便利店LAWSON旗下嘅Uchi Cafe當然趁住呢個時間，推出4款以櫻花為主題嘅甜品，包括有和式芭菲、銅鑼燒、櫻花餅、泡芙，總有一款合你心意~

春薫る桜シュークリーム 
LAWSON標準價格　180円(連税)
泡芙入面放滿咗櫻花味麻糬醬、櫻花忌廉，更加入櫻花葉片，成道甜品都散發出櫻花香氣。表面仲特意曬上櫻色嘅糖霜，鮮嫩嘅粉色賣相帶嚟春天嘅感覺！注意呢款甜品喺沖縄嘅LAWSON、關東嘅Natural Lawson都不設販賣咖。

春薫る桜和ぱふぇ
LAWSON標準價格　285円(連税)
呢款和式芭菲用咗同櫻花好夾嘅抺茶製成，底部係滿滿嘅櫻花餡料、抺茶慕絲，而上面就鋪上道明寺、白玉、櫻花作為裝飾，係一款充滿櫻花風味嘅甜品，同春天好相襯！同樣關東嘅Natural Lawson係不設販賣咖。

春薫る桜生どら焼 
LAWSON標準價格　270円(連税)
小編私心認為銅鑼燒嘅賣相最靚，燒餅中間夾住嘅餡料真係超吸眼球！入面分別係厚重嘅紅豆餡、櫻花忌廉，食嘅時候帶嚟雙重豐富口感，仲可以食到餡料中嘅粒粒紅豆，令人好滿足呀。呢款甜品係限定販賣三星期咖咋，要把握時間去試下！

桜餅(こしあん) 
LAWSON標準價格　150円(連税)
粉色嘅米飯上沾滿櫻花葉片嘅漬汁，口感黏糯並帶有花香。而中間就包住微甜嘅紅豆餡料，為食客帶嚟春天到訪嘅感覺~而呢款櫻花餅係數量限定嚟嘅，售完即止，想試就要快啲行動。