唔知大家放假會去邊玩呢?小編自己就周不時都會北上玩吓、食吓嘢,最常去就係深圳啦!今次就同大家推薦一家抹茶店,除咗嘢食味道好、裝修又靚、仲有漢服試著添!
門口就見到好靚啦!有好多櫻花做裝飾,仲有熊本熊公仔係門口迎接你大駕光臨!
店內裝修同擺設都十分用心,一間小小嘅店鋪有曬四季嘅景色,有櫻花樹、有楓葉、有竹等等;仲有好多著住古裝嘅公仔、仲有一把把倒吊嘅油紙傘,花款多多,但又唔會顯得唔協調!
連收銀都放左隻公仔,隻隻都好精緻㗎!店員姐姐仲好好人,可以叫佢幫手影合照!
連餐單都採用手繪風,樣樣都好吸引啊!同行朋友推薦我地一定要試千層蛋糕,小編試食完之後覺得蛋糕真心好味,但軟雪糕先係真心經過唔入去影相都好值得食啊!抹茶味好濃,牛奶味好香,連個雪糕筒都好好食啊!
店家同我地講有2套漢服可以借俾客人影相。小編自己㨂咗綠色漢服,仲有淺藍色可以揀,同背景好夾啊!
抹茶歐培拉 ¥35
唔好睇佢細細嚿,但其實佢一啲都唔惹少啊!抹茶朱古力、抹茶蛋糕同杏仁粉層層交疊,食落口靠感到濃厚嘅抹茶味,再有抹茶朱古力嘅香甜滲出,加上杏仁粉同糖粉嘅甜味,不論你係抹茶控定甜點控都會滿意。
宇治金時白玉 ¥32
呢碟宇治金時白玉係店內招牌,入面有抺茶蛋糕、綠茶粉白玉、抺茶雪糕、糖漬栗子同紅豆蓉。白玉好彈牙,就咁灑上緣茶粉食有啲淡,但加上紅豆蓉成件事就好合理;抹茶蛋糕就咁食有啲乾身,但右上抹茶雪糕就好完美,好神奇啊!
山核桃抹茶千層 ¥28
登!登!登!登!呢個千層蛋糕真係好高質啊!山核桃嘅香氣同抹茶嘅味道非常夾;山核桃被製成一粒粒嘅脆脆,鋪係軟滑嘅千層蛋糕上面,口感一流!
初代係全中國都有分店,小編今次去嘅係東門店,呢度嘅服務同環境都令人非常滿意,建議大家可以早少少黎,因為下午過咗3點呢度會排曬隊架!想影相可以係11點左右過去,增加漢服體驗嘅機會。
地址: 東門街道永新街59-11號(中泰來酒店對面)
電話: 13316985282
營業時間:10:30-23:00
人均消費:¥38