相信大家，特別係各位小朋友嘅家長，都比寵物小精靈最近搞嘅（超齡）兒童填色比賽搞到好失望。原因無他，真正嘅小朋友所「填」嘅作品得唔到獎，但就比啲「家長」搶走哂啲獎，仲點可以叫「兒童填色比賽」？由聯合國兒童基金香港委員會（UNICEF HK）舉辦嘅「小畫家大夢想繪畫比賽」就唔同啦！今次將會邀請各位小朋友到中環海濱長廊發揮創作才能，以防有出現「大人搶細路嘢」嘅情況。

  「小畫家大夢想繪畫比賽」係一個專為12歲或以下嘅小朋友而設嘅比賽。各位小朋友可以坐係中西區海濱長廊—中環段嘅草地上面，畫出以「『童』創大世界」為題嘅畫，畫出對美好世界嘅願景。

  除咗畫畫之外，今次嘅比賽仲可以等各位小朋友發揮「兒童幫助兒童」嘅精神，為中國山區貧困家庭籌款。雖然而家內地農村貧困戶可以免費享用住院分娩同部分醫療保健服務，但唔少貧困家庭因為擔憂影響生計同難以承擔嘅交通費而放棄使用母嬰健康服務，釀成孕產婦死亡同新生兒夭折嘅悲劇。藉著依個比賽，幫助山區貧困家庭，帶領佢哋走向更美好嘅未來！

  今次嘅比賽係由周大福珠寶集團有限公司贊助，並由華潤慈善基金有限公司同LEGO Hong Kong支持。今個比賽，LEGO Hong Kong仲為咁多位參賽者準備咗LEGO®樂高禮品，並設有「LEGO® Friends『童』創不同之旅」積木拼砌攤位，等小朋友透過結合個人興趣同砌LEGO嘅經驗，啟發創意同無限想像力。

  此外，今年新增嘅工作坊亦會加入音樂元素，包括「福星寶寶shake shake小沙鈴」、「搖滾福星寶寶小吉他」、「動感手搖鼓工作坊」同唱遊班等，等小朋友親手製作樂器同感受音樂美。比賽現場亦同時舉辦面部彩繪、趣味遊戲和慈善義賣等攤位活動，為家庭提供多元化嘅周末玩樂好去處。

  各位小朋友，「助人為快樂之本」，UNICEF HK所舉辦嘅「小畫家大夢想繪畫比賽」又可以畫又可以幫到住係內地嘅山區貧困家庭，快啲同你哋嘅爸爸媽媽講，叫佢哋帶你去參加「小畫家大夢想繪畫比賽」啦！