講到北海道嘅冬天，又點可以唔提到雪地？嫌滑雪太悶？唔緊要！北海道嘅羊ヶ丘係2019嘅1月上旬至3月上旬將會舉行名為「羊ヶ丘Snow Party 2019」嘅活動，無論大人定係小朋友都好，一家大細都可以盡情「玩」雪，享受白雪之冬！

#     雪山管滑

(hitsujigaoka.jp)

細個嗰陣，成日都係公園瀡滑梯。而家大個，係公園同啲小朋友爭滑梯瀡，都咪話唔羞恥。所以而家剩係可以係公園一邊望住啲小朋友瀡，一邊概歎「無知的小孩一秒長大」。嚟到羊ヶ丘，就可以拾回童心，盡情係真正嘅雪山上面，坐住水泡盡情瀡「滑梯」，而且大人細路都啱玩！懷念細個嗰陣係公園瀡滑梯嘅你，仲唔快啲爬上羊ヶ丘，瀡真正嘅「雪山滑梯」？

#     雪屋

(hitsujigaoka.jp)

傳聞愛斯基摩人會係雪屋入面休息。今個冬天，係羊ヶ丘到有個用雪堆積而成嘅雪屋，比大家係「玩」雪嘅途中休息之餘，仲可以影相打卡，話比人聽你去咗愛斯基摩人嘅屋企，又或者同仔女入去，探索雪屋嘅奧秘。

#    迷你雪人製作

(hitsujigaoka.jp)

成日聽啲人話去堆雪人，但你有無聽過人堆「迷你雪人」？今個冬天，堆「迷你雪人」嘅機會嚟啦！羊ヶ丘舉行咗全世界唯一嘅「堆迷你雪人」活動，等大家同自製嘅「迷你雪人」合照，共享同小朋友製作雪人嘅天倫之樂。

#    雪地滑步車

(hitsujigaoka.jp)

大家有聽過水上電單車，但有無聽過雪地滑步車？雪地滑步車係由單車改裝而成，將單車嘅車轆改裝成滑雪板，造成係雪地上都可以輕鬆行走嘅滑步車。雪地滑步車係2至5歲嘅小朋友限定，小朋友唔單止可以係雪地上「滑單車」，仲可以利用雪地滑步車係雪地上平衡，由細學習雪地滑行。

(hitsujigaoka.jp)

雪，唔單止可以滑，仲可以「玩」。係羊ヶ丘到，唔單止可以滑雪，仲有一家大細都岩嘅「玩」雪活動。今個冬天，帶埋你嘅小朋友去「羊ヶ丘Snow Party 2019」，一邊體驗「玩」雪嘅樂趣，一邊共享天倫之樂！

「羊ヶ丘Snow Party 2019」
地點：日本〒062-0045 北海道, 札幌市豊平區羊之丘
日期：2019年01月04日至2019年03月10日
時間：10：00至16：00