話說有一日Y小編同揸機哥哥喺旺角行街,經過旺中覺得肚餓就入咗去搵食,用咗$50就食飽出返黎啦!仲發現到堅好食嘅小食添!好食嘅嘢真係唔一定貴架,小編真心推薦俾大家啊!
第一站:洪祖師
其實好多人都知佢嘅擔仔麵非常不賴,但今次我地就試咗佢地嘅鹽酥雞,即叫即整!係炸好之後仲可以自己落味粉,就算係重口味一族都可以一試呢!份量唔算多,但2個人都夠食嘅,$18都叫幾抵食。
地址:旺角彌敦道688號旺角中心1期1樓F88A號舖
第二站:杯中物
呢間小店主打「貓包」,但我地資金有限,唯有揀$10一份嘅地瓜丸,原本冇乜大期待。佢個賣相好似一兜咖哩魚蛋咁,仲有片蝦片裝飾添!食落真係好驚喜!炸皮入面包住軟綿綿嘅蕃薯蓉,好香甜啊!
地址:旺角彌敦道688號旺角中心一期1樓F87B號舖
第三站:金沙糖
食左咁多熱氣嘢,係時候飲杯嘢潤吓喉。金沙糖算得上良心小鋪,好多平野飲,我地就揀左$8一杯嘅木瓜汁,其實見到佢係加左少少糖水,都明有成本嘅考量,但勝在老細會可以免費加西米,姐飲嘅唔係果汁,係老細嘅心啊!
地址:旺角彌敦道688號旺角中心一期2樓S71B號舖
第四站:又一戟
掃街又點可以少咗雪糕呢?又一戟嘅雪糕正常份量都好大球,我地就用$14買咗2球,我就鐘意士多啤梨味,好似雀巢三色雪糕嘅草莓味;揸機哥哥就鐘意曲奇味,幾啖就食晒喇!除左雪糕之外,又一戟嘅班戟卷好出名架,行過可以試吓!
地址:旺角彌敦道688號旺角中心一期 2 樓 SA31
Tags: Homita食咩好
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like