想瘦身成功就要堅持做運動同埋控制飲食係人盡皆知嘅事，但你地又知唔知除咗呢兩點之外，睡眠都係減肥嘅關鍵呢？日本醫生佐藤桂子就提出咗337睡法，只要你可以遵守到呢三個原則，每晚單靠瞓覺就可以消耗300卡路里！

呢種睡眠減肥法其實係利用生長激素嘅作用去逹到瘦身嘅效果，人喺睡眠中分泌出嘅生長激素可以幫忙修復身體，消耗卡路里。但睡眠質素唔好嘅話就會令生長激素嘅分泌減少多達七成。除此之外，瞓得唔好嘅人體內會分泌更加多促進食欲嘅物質，令你第二日食得更多野，不利於減肥事業。

想好好咁發揮生長激素嘅作用的話，就要遵守下面嘅3 3 7睡法啦！

#再夜都要喺3點前瞓
人體分泌出生長激素嘅高峰時段係晚上十點至到淩晨三點。另外，按照人體活動週期嚟睇，三點亦都係人最容易進入深層睡眠嘅時間，所以喺呢個時間段瞓覺就可以有更加好嘅睡眠質素。

#入睡後三小時保持睡眠狀態
人進入睡眠後嘅最初三小時就係生長激素集中分泌嘅時間，之後嘅時段基本上就唔會再分泌。所以大家要好好咁準備睡眠環境，例如喺以遮光簾打造漆黑嘅睡眠環境，令自己加容易進入酣睡狀態。

#每日瞓足七個鐘
有研究指出，每日只係瞓五個鐘嘅人肥胖率達五成，而只有四個鐘嘅就更係高至七成三，同時瞓得過多亦都會導致肥胖率上升。所以大家都要注意自己嘅睡眠時數，儘可能每日都瞓夠七個鐘。