大多數人都睇過《千與千尋》呢部動畫電影,當中嘅場景奇幻而美麗,令人不禁感嘆作畫師嘅技術超凡。其實呢啲精緻嘅背景設定都係由實景取材咖,位於日本山形縣 ,名為銀山温泉嘅古老温泉小鎮就係其中一個參考地啦。
呢個小鎮極具歷史氣息,建築展現大正末期至昭和初期嘅木質結構,可以見到大正時代特有嘅迷人風貌。木造嘅老旅館都係沿住銀山川而建成,嚟到冬天嘅時候屋頂積雪,加上兩側黃煤燈映照,為場景加添幾分浪漫。
銀山温泉嘅降雪量被稱為日本數一數二嘅,由十一月開始落雪,喺十二月左右去就可以見到白雪紛飛嘅場面啦!
踏上銀山温泉街就如同穿越至《千與千尋》嘅世界當中,映入眼中嘅景色令人驚豔,加上氣氛寧靜,令遊人仿佛步入仙境,忘卻現實嘅一切煩惱。
去到温泉街又點少得泡温泉呢?入口處有免費嘅泡足湯「和樂足湯」,想驅走腳上寒氣的話就不妨去呢度泡一泡腳,仲可以一路觀賞雪景,必定萬分惬意。
交通方面,大家可以由東京出發,乘坐JR山形新幹線由東京車站出發,大約 3 小時 20 分鐘就可以去到大石田車站。之後就可以換乘巴士,大約40分鐘就可以去到銀山溫泉。
Tags: Homita去旅行
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like