成日都聽人食台灣手信，不過台灣野真係好正好好食啊，不過唔知入口左香港之後有冇咁好食呢？小編就想同大家試食下幾款係香港有得賣嘅台灣果酥，睇下係咪真係同台灣買翻黎嘅一樣咁好食！

果子工方綠茶酥 $14

推薦度★☆☆☆☆

點解小編會咁狠心俾得一粒星咁少呢？大家可以睇返段片，佢真係令我有上當嘅感覺，佢包裝上嘅餡綠到一個點，令人以為係抹茶味！點知打開之後係啡色架！而且味道亦都有少少令人失望。唉，喜歡飲中國茶嘅嘅朋友可以一試嘅，但就唔好配好茶啦，比較左之後可能會更加失望lol！

果子工方荔枝酥 $14

推薦度★★☆☆☆

呢個荔枝酥嘅餡令人唔太滿意，雖然放得落口囉！但剪片哥哥就評價唔多好，可能佢重口味，小編自己就偏好淡口嘢，都叫有甜味嘅，但荔枝味就真心唔重，係香精味，唔太推薦。

果子工方鳳梨酥 $14

推薦度★★☆☆☆

其實準確少少黎講小編係想俾佢２.５粒星，都係嗰句，淡口但又香精味，而且成個系列嘅餡都偏軟，唔係好岩我地口味，但真係要食就鳳梨酥最好囉。

台灣迷你小鳳梨酥 $32.8

推薦度★★★☆☆

其實佢個皮係幾好食，個餡都叫做係接近台灣口味，點解得３粒星就只係因為比起其他果酥佢計落係最貴架，所以扣咗少少分數，總括而言係幾好味架！

一口芒果酥 $27

推薦度★★★★★

小編都估唔到竟然會係芒果酥最好食！佢嘅餡係芒果乾味，唔會覺我好人工，口感都好唔錯，亦都係一致認為嘅好食，需要回購啊！而且佢細細粒，食少少都唔會好高熱量，係好好嘅辦公室零食呢！

一口鳳梨酥 $27

推薦度★★★★☆

雖然佢冇同一品牌嘅芒果酥咁香濃，但佢真係算得上係好食嘅鳳梨酥，雖然都及唔上幾間出曬名嘅台灣手信咁好食，但呢個價錢同埋有比較之下呢盒一口鳳梨酥真係不賴架，口痕食返幾粒係幾過癮！

唔知你地仲有咩推薦或者有興趣嘅台灣小食呢？有嘅記住留言話俾小編啦！下次我地會出埋牛軋餅系列試食架，記住留意我地Homita嘅facebook 啦！