香港人成日都去旅行,小編都唔例外。小編我特別鍾意背包旅行,背包旅行嘅重點係咩?當然係行李越少越好啦!(唔好話背包旅行,任何旅行都係!)不過,有時帶少咗某啲野又好撈搞,久而久之,就會有一張「旅行必備」清單。今日,就等小編我分享下我張「旅行必備清單」啦!
# 純天然植物油
(google 圖片)
好多人一聽到「油」就好抗拒,驚生粒粒等等。事實上,油份提供皮膚重要嘅脂質,既可以保濕鎖水,又可以保護皮膚。而護膚,最緊要係「從簡」。再且,「油」有好多作用,除咗護膚之外,仲可以卸妝同當髮尾油用。與其拎一SET護膚品,仲要再拎護髮產品,不如就咁拎一枝「油」解決所有問題!純天然嘅植物油,正正滿足到我去旅行嘅一切需要。
# Hand Cream
(google 圖片)
小編成日都去日本旅行。眾所周知,日本氣候乾燥,每次冬天去旅行,雙手都會乾到龜裂,甚至流血。有時仲會搞到銀包、電話都係!經過嗰次教訓之後,我去旅行點都會隨身帶備一枝細細枝嘅hand cream,一得閒就拎出嚟搽,以防出現雙手「血流成河」嘅情況。
# 潤唇膏
(google 圖片)
除咗對手乾到甩皮之外,小編個口成日都㿺㿭。所以小編我無論係出街定去旅行,都會帶潤唇膏,食完野洗完臉之後都會拎出嚟搽。
# M巾同M痛藥
(google 圖片)
萬一去緊旅行果下突然M到,就真係好撈搞!小編就試過臨返香港嗰日突然M到,雖然便利店周圍都有,但都好心慌啊!自從嗰次之後,小編去親旅行都會帶定幾塊防身,拒絕尷尬。旅行中嚟M除咗唔方便之外,最令人沮喪嘅就一定係痛經,但又無理由因為M痛,浪費一日時間係酒店休息。有見及此,M痛藥絕對係小編去旅行嘅必備恩物。
# 敏感藥膏
(google 圖片)
上面先講過,小編有皮膚敏感嘅問題。雖然已經改善咗好多,但難保唔會因當地嘅氣候、污染等等嘅原因導致敏感。萬一去旅行果時敏感爆發就煩啦!所以,小編點都會帶定一枝敏感藥膏,以備不時之需。
# 平安藥
(google 圖片)
去旅行就最怕病!首先溝通上已經係一個問題,而且去到外國,睇醫生都特別貴。所謂「平安藥」講緊就係一啲應急藥品。好似小編咁,腸胃差得嚟又有鼻敏感,就會帶定啲敏感藥同腸胃藥旁身。所以去旅行最好就搵你嘅家庭醫生,去配適合你嘅平安藥。
以上,就係小編嘅旅行必備清單。當然,每個人嘅旅行必備恩物都可以好唔同。如果你係旅行新手,或者覺得自己以往所帶嘅行李唔係太多就係帶漏野,不仿參考下小編嘅「旅行必備清單」。