相信大家睇大話西遊嘅時候，對呢句說話都唔陌生，就係：「如果非要在這份愛加上一個期限，我希望是一萬年......」但係熱情又可唔可以維持到一萬年咁耐呢？好多時候拍拖，過多一、兩年熱戀期就會無左，漸漸大家都會變左「老夫老妻」模式相處，可能你地都深愛對方，但慢慢因熟悉同習慣而冷淡落黎，今次小編就教你低成本咁撻著住愛火，今個冬天可以同情人暖笠笠、甜蜜蜜咁過。

＃重新開始約會

拍拖耐左，好多野都會變成習慣，同時大家都會懶左，例如懶得約會，懶得為對方準備小驚喜等等。如果想令感情保持甜蜜，新鮮感係必然既。可以揀啲你地以前無嘗試過既事情，例如參加唔同興趣班、甚至一齊參與烹飪課都可以。或者係每個假日都搵一個你地鐘意既餐廳約會，然後就一齊漫步談下心事，都可以為感情升溫架。

＃花心思扮靚

拍拖當然唔可以只講外表喇，就算關係變得穩定，都唔可以毫無節制咁大吃大喝，令自己暴脹，身材走樣，保養又唔勤力做！或者同對方出街既時候唔再悉心打扮、化妝，都會令對方失去興致架。女生們無論如何，都要好好保養自己，花錢投資落自己身上先係最值得。

＃慶祝彼此成功

當你伴侶獲得某項成就，或者俾老細表揚加許既時候，你一定要為對方高興，但係好少情侶會因為呢啲事情而慶祝。其實可以分享雙方既成就，亦係一件值得幸福既事，仲可以為對方加強自信心，亦能令雙方感覺變得更堅固同親蜜！