除左藍色咖哩飯、藍色可樂、藍色雞湯拉麵，小編以為自己對藍色食物嘅恐懼已經被戰勝，但一山還有一山高，最終都係輸左俾日本嘅暗黑系料理，係暗藍系先岩。日本人對於發明各種異的食物真係樂此不疲啊！最近小編睇到日本有個網友製作出了一款無得輸嘅章魚小丸子，引起網民一片熱烈討論，仲被日本媒體喻為係挑戰「創造主」嘅存在！小編脆弱嘅心臟承受唔住啊！一定要同大家分享吓！

All photo via kyooochang

就係佢啦，呢款被網友冠以地球之名嘅章魚燒，隔住個mon小編都聞到浸暗黑味啊！比起地球，小編認為更加似混錯色嘅泥膠，好混亂好混亂，諗起呢堆波波係要放入口都覺得驚，俾返正常嘅章魚小丸子我啊 ！！！

其實呢位日本網友係三年前就整過藍色章魚小丸子，不過今次係研極版！藍色部分變得飽和，配上灰灰綠綠黃黃嘅不知名顏色，加埋章魚小丸子本身嘅火星表面，真係好挑戰人類極限，完全唔想放佢入口，好想講返句不可以玩食物！

成品睇起上黎仲有少少焦脆嘅感覺，好崩潰啊！即使配搭正常嘅醬料又撒上柴魚片，都無法激起小編嘅食慾，太強大啦。

出乎意料嘅係，呢啲咁恐怖嘅外星章魚燒製作竟然係咁靚嘅！？雖然感覺唔似食物，但顏色好鮮艷好美好啊，所以話幾美好嘅事物都好，唔用正確方式對待，就會變成災難，望住張圖真心希望佢永遠都唔好熟，唔好變成嗰啲暗黑料理，唔好啊！

唔只章魚小丸子，呢位日本朋友真係藍色食物狂熱者，挑戰咗各種藍色食物，例如呢個面包，天啊，點解要咁做啊，好壓抑啊！

雖然話呢位朋友製造出好多難以入口嘅料理，但偶而都會有成功實驗品，譬如呢個卷蛋，不過成功率可以高返少少就好……

藍色冬甩睇上去應該幾好食，加上彩針好似幾開心。

最最最正常莫過於係呢杯飲料，相信亦大家對佢接受度最高嘅一款啦。

其實以上嘅食物都只係加左食用色素去製作，但正所謂食物就要食香味俱全，外表恐怖嘅食物真係令人抗拒啊！不過用黎整鬼節料理似乎不錯 ！？不過點都好，小編希望呢位網友可以不斷進步，唔好再整暗黑料理啦，想睇多啲可以follow佢instagram:kyooochang