小編上個月去咗曼谷，返黎對佢地嘅美食念念不忘，所以得閒就會搵下曼谷嘅美食資訊，而Or Tor Kor街市就比小編我劃為下次必去嘅地方，佢唔止又大又乾淨，而且無論乾貨、生果、海鮮、熟食甜品等都可以係度搵得到，十個區域等你慢慢尋寶，買手信OK！即刻食都無問題！

呢度有成608個攤位，聚集全國最好最新鮮嘅農產，鍾意食生果嘅大家一定要黎！唔好以為街市一定會污糟，Or Tor Kor被CNN 評選為全球最乾淨街市第四位，係度你只會聞到果香，唔會有異味。



呢度有勁大粒荔枝，個口細啲都放唔落，粒粒都非常飽滿，又香又甜，一口咬落去大爆汁，好Juicy啊！

泰國手信一定會買芒果乾，係超市買嘅會比較死甜，但呢度嘅芒果乾厚薄適中，唔會太乾都唔會太甜，反而有一種天然微酸帶甜嘅感覺。

佢嘅熟食區一樣好食，只要７—１０泰銖一串嘅串燒，店家用牛奶同黃咖哩粉醃過肉串，所以烤制嘅時候可以鎖住肉汁，加上秘製沙嗲醬簡直係不得了！

你喜歡咖央嗎？軟軟嘅麵包入面填滿香甜嘅咖央醬，自己食或者做手信都棒棒的！

呢度嘅豬腳飯只要５０泰銖，豬腳好嫩，瘦肉仲可以配上特製嘅甜酸醬。如果大家食得辣，要跟當地人嘅順序，先食一啖飯，再配上辣椒仔同蒜頭，辣椒仔真係超辣，大家唔好亂咁試啊！

Or Tor Kor
地址：Paholyathin Road, Bangkok, Thailand泰國
電話：（+66）2-279-2080
時間：06：30～18：00