識朋友好多時都要睇下夾唔夾，有時候明明只係新相識，但就可以一見如故，秒速成為好朋友。有無諗過星座對你地能否成為至交好友都有啲關係呢？下面就係十二星座嘅最合拍朋友，睇下你同你嘅閨蜜又係咪其中一對啦！

＃巨蟹座Ｘ處女座

呢一對閨蜜絕對係對方心靈上嘅好伙伴。巨蟹座能夠了解處女座嘅細微心思，而挑剔嘅處女座亦願意同巨蟹分享心事。兩人相處嘅時候總係會講八卦話題，但喺對方有需要嘅時候亦總係會俾有用嘅建議，絕對係一對玩又得，認真都得嘅知己好友。

＃獅子座Ｘ射手座

霸氣嘅獅子座同直率嘅射手座一樣，都係愛追求自由！兩人可以唔受約束一齊癲，好好咁享受自由自在嘅快樂。難得可以揾到一個願意一齊挑戰各種新鮮事小伙伴，就自然會成為好閨蜜啦！

＃天蠍座Ｘ山羊座

呢兩個星座都係非常敏感，而且好識點樣隱藏自己嘅內心。所以佢地可以輕易咁了解彼此壓抑喺心底嘅真實情緒，一旦成為交心好友，就打風都打唔散！最緊要係佢地互相信賴，咁就當然係可以友誼永固啦！

＃白羊座Ｘ水瓶座

白羊同水瓶同樣愛追求自由，又有我行我素嘅一面，真係非常合拍！最重要嘅係佢地都喜歡追求新鮮事物，彼此嘅存在令到生活分外精彩豐富，仲可以鼓勵對方一齊追求夢想。

＃金牛座Ｘ雙魚座

呢對南轅北轍嘅星座嘅互補性格令佢地可以成為最佳閨蜜，穩重踏實嘅金牛座可以彌補雙魚座嘅不切實際。而且雙方對會靜心聆聽對方嘅心事，金牛明白雙魚嘅多愁善感，雙魚嘅敏感能察覺金牛封閉嘅內心世界。互懂對方令佢地嘅友誼堅不可摧！

＃雙子座Ｘ天秤座

多變嘅雙子座時常都有稀奇古怪嘅諗法，而天秤嘅隨和性格就能輕易接受雙子嘅妙想天開。其實天秤喺開朗外表下，亦都神秘嘅一面，令人想一探究竟，某程度上同善變嘅雙子都好相似咖！