呢幾日真係超級熱! 唔好話行山,小編係戶外企係度等攝哥哥都已經汗流浹背,所以今次我地唔上山,同大家去上水河上鄉,行又得,踩單車亦得,全程平地易入,仲好靚添!
首先可以係上水站A1出口向右走,一路行到路口會見到隔離有條隧道過咗之後行前少少就可以過馬路到對面,再一直向前行,就會見到上水救護站。
係上水救護站執邊會有一個紅色嘅欄杆,行入去再向前行,好快就會見到水管啦,大家唔好心急爬上去住啊!因為前會會更加美麗。
係度其實就見到東鐵駛向羅湖,遠處仲見到深圳嘅高樓。再沿石上河向前行,始終呢度都係鄉郊地方,好大浸肥料嘅味道,不過風景真係幾靚,香港呢啲地方真係買少見少。
行行下我地就見到近在咫尺嘅深圳,一河之隔,一邊係鄉村、另一邊就係另一個城市嘅商業區。行行下見到對面仲有紫色嘅花海,而河名都變咗做雙魚河。
見到呢個路口就可以轉入去,好多人會係呢度爬上大水管影相,亦都有人會係度捕捉東鐵經過嘅一刻影相。
影完相出返路口,再沿路向前行就係河上鄉啦!呢度有間「豆美味豆花團」,入面有傳說中嘅豆花放題,亦都可以就甘買返支豆漿或者食個豆腐花,呢度豆花好好食架,黎到唔好錯過啦!
回程大家可以行返出去,亦都可以係度搭51K小巴出返上水站,小編建議大家如果食得太飽最好就慢慢行返去啦,行返出去上水仲有好多好野食,岩岩好消化完畢!
難易度:★
全程都係平路,路線亦都唔長。
打卡度:★★★★
大水管、梧桐河,附近仲有古蹟添。
設施完善度:★★★★★
基本上都係車路,不過無指示牌。
夏天去郊遊一定要帶水同做足防蚊措施,最好帶埋把遮,曬得耐好易中暑架,今次嘅郊遊習作係咁多,我地下次見啦!
Tags: 郊遊習作
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like
郊 Landscape | by Y小編 | 6 years ago
郊 Landscape | by Y小編 | 6 years ago
郊 Landscape | by Y小編 | 4 years ago
郊 Landscape | by Y小編 | 5 years ago
郊 Landscape | by Y小編 | 5 years ago
郊 Landscape | by Y小編 | 5 years ago