小編不時都會去食嘅三星台菜食堂灣仔店，由傅珮嘉同台籍老公Steven開設，今次佢地係沙田開新分店，小編梗係要去試下啦！

沙田分店比灣仔同銅鑼灣分店都大，亦都比較多選擇。不過個座位設計就好奇怪，小編坐嘅位不斷有店員出出入入，仲係小編頭頂拎野，如果個位再放入少少就好啦。

今次我地叫咗三星牛肉麵(蕃茄味)同魯肉拌麵(粗麵)，另外仲叫咗炸花枝丸、黑糖冬瓜茶同冷泡茶。其實今次都幾失望，因為呢間分店無論係食物同服務，都比唔上灣仔分店啊。

三星牛肉麵(蕃茄味)湯底不俗，不過蕃茄味可以再重D，牛肉、牛筋同牛肚都好入味，可惜麵身唔掛湯，唔知係咪未煮透，無灣仔分店咁好味啊！

魯肉拌麵嘅麵都係一樣啦，有一種未煮透嘅感覺，不過魯肉汁幾出色，配上麻醬嘅味道，份量都幾夠，如果麵身再好食啲就完美。

炸花枝丸係彈牙嘅花枝丸伴以蒜粒炸香，花枝丸係碎上，女仔可以斯斯文文咁食，好貼心。

黑糖冬瓜茶小編係叫半甜，但上咗少甜比我，飲落係巨甜，同台灣嘅冬瓜茶有一點點距離，不過可能係因為小編口味比較清淡，朋友話少甜嘅甜度係剛剛好。

冷泡茶茶味濃，入口甘香，茶味留係口入面久久不散，食完魯肉拌麵再呷一口冷泡茶，正啊！

呢度仲有挫冰食，有十幾款配料可以揀，以Topping嘅數量去計錢。

今次嘅試食其實真係有一點點失望，因為店內其實人唔算多，人手充足之下都可以漏單，小編想詢問嘅時候，店員唔單止冇回應，仲係一副失魂相轉身就走，過一陣先拎埋張單黎話Sorry漏咗單；可能因為太趕住上菜麵食先會有未煮透嘅感覺；另外，小編都眼見隔離檯入坐咗一陣都冇人斟水，要客人自己要求先有人斟水，同其他分店落差太大啦！小編食過其他2間分店都真係幾高質，希望佢地會有進步啦，如果唔係食物再好都浪費晒了。