夏季嚟臨對喜愛旅遊嘅香港人嚟講,就係收拾行李,去到外地好好咁享受假期嘅時間。香港人平日居住喺滿係高樓嘅城市,一有機會就梗係想去其他地方欣賞大自然啦。瀑布就係其中一個令人嘆為觀止嘅自然景觀,今次就等我精選五個位於亞洲嘅瀑布俾大家啦!
#德天大瀑布
德天大瀑布位於廣西壯族自治區西南山區,係一個國家級景點。瀑布橫跨中國同越南,係亞洲第一、世界第二大嘅跨國瀑布。瀑布發源於歸春河上游,河水被浦湯島所阻擋,令高達50餘米嘅瀑布就此形成。瀑布嘅景色仲會隨於季節變遷及河水流量多寡而展現唔同嘅樣貌。
#鏡泊湖瀑布
位在黑龍江寧安縣的鏡泊湖瀑布被譽爲北方的西湖,佢係中國最大火山瀑布。多年前嘅火山爆發阻塞咗牡丹江嘅原有河道,形成鏡泊湖。呢個瀑布嘅形狀與位於美國及加拿大邊境嘅尼亞加拉瀑布非常相似,鏡泊湖瀑布幅寬約 70 多米,雨水量大時,幅寬更可增至 300 多米,水聲如雷,猶如萬馬奔騰!
#蛟龍瀑布
蛟龍瀑布不但係台灣最高嘅瀑布,亦係東亞地區最高嘅瀑布之一!700幾公尺嘅落差高度為瀑布帶嚟雄偉景像,夏季水量大時水流會分成二層俯衝而下,冬季水量少時就會分四層流入山谷。遠睇嘅時候瀑布就似一幅巨型山水畫,流水由雲霧繞繚嘅崖頂傾瀉而下,氣勢磅礡。
#那智瀑布
那智瀑布位於日本和歌山,高131米、寬13米,有指瀑布嘅水具延年益壽嘅功效。呢個瀑布除咗係「日本瀑布百選」之一外,更喺「日本三大名瀑布」中佔一席位。據說瀑布下方嘅飛瀧神社所奉祭嘅神明就住喺瀑布中,瀑布上面綁著注連繩就係用嚟守護呢個瀑布嘅。
#華嚴瀑布
華嚴瀑布位於日本栃木縣,亦都係「日本三大名瀑布」之一。佢嘅中段被稱為「十二瀑布」,小瀑布們匯聚出壯麗嘅瀑布區。一,二月時,細小瀑布會因為寒冷而結成青冰。去到年中,燕子們會喺瀑布周圍飛翔,而秋天嘅時候當地就遍野紅葉。可見瀑布喺唔同季節會展現出獨特嘅自然樣貌及景色。