你知唔知其實香港都有好靚嘅太陽花海？今次我地唔遊山玩水，同大家黎到呢個元朗嘅向日葵農場信芯園，一齊黎睇太陽花！

入信芯園最好就搭公共交通工具，我地就揀咗係錦上路站C出口小巴站搭78號小巴，係石湖圍落車，過馬路之後就見到信芯園嘅指示啦！沿指示行10分鐘以內就到達信芯園，一片片花田滿開真係好靚啊！

入口有太陽花賣，40蚊1枝、100蚊3枝，除咗用黎影相都可以帶返屋企做裝飾，工作人員表示應該放到一個星期左右，大家都不妨買黎支持下啊！

現場仲有留言版，比大家寫底想同老闆講嘅說話，好多人都好支持老闆！睇到小編心都好暖啊！

每一行太陽花中間都有條小路比大家走入去，大家入去之前請先知會現場工作人員，佢地會帶你入田影相。

藍田白雲下嘅花海真係好靚啊！但其實呢啲向日葵真係唔係咁易種，要花好多心力打理架！所以大家要好好珍惜呢片花海，小心唔好破壞到佢地啊！

難易度：⭐

行入去有好多指示，唔怕盪失路。

打卡度：⭐⭐⭐⭐⭐

香港唯一一片太陽花花海，點可以唔黎影返夠本？

設施完善度：⭐⭐⭐⭐

農場好好心整咗好多指示，入面都有廁所、有汽水售賣。

大家可以自備少少道具黎影相會更特別！另外鄉郊地方好多蚊，大家黎呢度最好噴定蚊怕水！今次嘅郊遊習作係咁多，我地下次見啦！拜拜！