夏日炎炎,不如就食返啲香口野揾返胃口啦!Chicken & Co 主打雞肉菜式,雞肉都係選自法國穀飼春雞。啲雞係人道飼養而成,唔單只無加入激素,仲全非基因改造,等大家可以食得放心。
You Are What You Eat!係呢間餐廳嘅主張,除咗着重食物嘅味道之外,食得健康亦係佢地嘅關注點。
檸檬百里香炸雞 $30
呢款炸雞非常大件,帶有一陣香草味道及清新嘅檸檬香氣。表皮炸到香脆可口,而內裏嘅雞肉就仍然鮮嫩可口,真係無得頂呀!
蒜香蜜糖雞全翼 $12
呢款雞全翼表面佈滿咗餐廳自製嘅蒜粒,為佢帶嚟誘人香氣。眾所周知,蜜糖同雞全翼係絕配。層層蜜糖未有掩蓋蒜香,反而兩者互相配合,令雞全翼嘅香味同味道都錦上添花。
脆雞粒 配 秘製千島醬 $26
雞粒本身已經非常香口,而重點就係佢配上嘅秘製千島醬啦!呢款醬食落酸酸甜甜,當中帶有陣陣芝士香味,喺熱天食就相當開胃啦。配上熱騰騰嘅雞粒就簡直係完美呀!呢款醬由餐廳自創,仲係夏天先有,所以喺外面餐廳係食唔到呢種味道咖。
菠蘿蜜桃梳打 $18 (套餐升級+$6)
夏天就當然唔少得冰涼嘅梳打啦。微酸嘅菠蘿一掃炎熱天氣帶嚟嘅食慾不振,令你可以開懷大食。外面通常會將菠蘿切成粒,但呢度就將菠蘿片放喺飲品表面,可見造型特別。而杯身就用咗摩登嘅設計,帶嚟新潮玩味嘅感覺。
本身餐廳以外賣為主,佢地提供嘅餐具係以粟米製造,可以自然分解,能夠顧及環境。喺6月30號之後餐廳就加返座位,等大家可以堂食。呢度食物高質之餘,價錢亦相當親民,唔洗花費太多就體驗到真正法式味道啦!
Chicken & Co
地址:長沙灣元洲商場地下G01號鋪(3468 6990)