小編簡直係KitKat嘅忠實粉絲，特別係每次去到日本都要睇下有冇出新口味，或者係地區限定口味，而且仲係手信界必買品，而小編次次都買好多返香港（俾自己食）！今次小編就幫大家整合左日本各地既特式KitKat口味～

#九州沖繩 紫薯口味

紅芋係九州南部同沖繩地區嘅名產之一，亦即係我地香港嘅紫薯，鮮豔嘅紫色令人印象深刻，果然紫薯嘅威力係好強大！

#九州 甘王士多啤梨口味

九州福岡係全國頂級嘅草莓產地，又以甘王（あまおう）嘅品種草莓最出名。呢款甘王草莓口味嘅KitKat甜得嚟又滋味，如果你鐘意甜中帶點微酸滋味嘅話務必要試下。

#廣島 紅葉饅頭口味

呢款連巧克力嘅表面都有楓葉圖案，係由廣島嘅代表性名物紅葉饅頭嘅老舖「高津堂」監修而成，只有係廣島地區限定發售！

#京都 宇治抹茶口味

抹茶口味我諗大家都有食過，亦都唔會陌生！但原來呢款宇治抹茶口味係同當地老舖「伊藤久右衛門」合作推出，嚴選了宇治抹茶嘅濃醇風味，同白巧克力融合起來更是絕配。

#京都 宇治焙茶口味

比起抹茶，舊年日本流行起一陣焙茶旋風，清透感茶色、渾厚茶香同回甘有勁嘅尾韻，超級受日本女仔歡迎架！如果食厭咗抹茶口味，不如試下焙茶口味KitKat。

#東海北陸 紅豆夾心三文治口味

以喫茶店聞名全日本嘅名古屋，正好位於東海地區嘅愛知縣。每食一啖都令人懷念起喫茶店嘅時光，記住淨係得愛知縣、岐阜縣、富山縣、石川縣⋯可以買到咋！

#靜岡 芥末口味

聞起來嘅味道完全同山葵一樣，當芥末同白巧克力融合，有種講唔出口嘅滋味，不過絕對唔辣，仲係甜甜地添。目前呢款芥末口味只有係靜岡同一部份嘅關東地區售賣。

#橫濱 草莓芝士蛋糕口味

這款擁有濃郁口感嘅草莓芝士蛋糕口味嘅KitKat，充滿濃濃嘅草莓味道，加上白朱古力超級香甜，相信好多女仔都會鐘意呢款！

#北海道 紅豆草莓口味

呢款紅豆＆草莓嘅KitKat巧克力，係2018年6月新推出嘅北海道限定口味， 一口咬下去可以感受到紅豆嘅微甜同草莓酸甜滋味，真係令人一試難忘～

#東京 蘭姆葡萄乾口味

um...其實小編就唔鐘意食提子乾嘅，不過見係Kitkat就俾面佢啦！呢款混入咗壓碎嘅餅乾顆粒，而且有香滾嘅蘭姆葡萄味，唔會太甜。

#信州 蘋果口味

以信州嘅乾淨水質同清澄嘅天空培育而成嘅「信州蘋果」，食落有陣陣蘋果甘香～